Ubwo ishyirahamwe ry’abanyamakuru barwanya SIDA n’izindi ndwara z’ibyorezo “ABASIRWA” basuraga Akarere ka Bugesera mu rwego rwo kumenya uko abaturage b’aka Karere bitwara muri gahunda zo guhangana n’iki cyorezo cyibasiye isi n’u Rwanda rudasigaye, hagaragajwe ikibazo cy’ubukene nk’inzitizi ikomeye mu kwirinda no gukumira Covid-19 mu buryo bunyuranye.
Ku ikubitirro iki kibazo cy’ubukene cyagaragajwe n’abaturage bo mu Murenge wa Gashora, Akagali ka Ramiro, mu Mudugudu wa Kagasa ya 1, aho Musabyimana Mariya w’imyaka 63 yatangaje ko ubushobozi buke bwo kugura injerekani y’amazi igura amafaranga 100 rimwe na rimwe ikaba yagera ku mafaranga 200, bituma uyu mukecuru n’abo mu rugo rwe gahunda yo gukaraba intoki n’amazi meza batabyubahiriza kandi ari bumwe mu buryo bwo kwirinda kwandura Coronavirus ndetse no kumesa udupfukamunwa mu masaha ategetswe ntibibakundira.
Yagize ati “Gukaraba intoki byo ntibirimo rwose kuko n’iminsi itatu yashira umuntu atanihumuye mu maso kuko kubona amazi ari ikibazo, ku mavomo injerekani igura amafaranga 20 ntibajya baduha amazi icyumweru cyashira batayaduhaye, bayohereza mu bigega by’aho tuvoma injerekani ihagaze 100 cyangwa arenzaho. Ikindi kibazo gikomeye kubona amazi yo kumesa agapfukamunwa ntibikunda, aho umuntu yamara icyumweru akambara ariko katameswa, murumva rero ko ubukene bwo kutigurira amazi bwaba isoko yo kwandura Cocid-19 mu buryo bworoshye”.
Mugisha James wo mu Mudugudu wa Rutete site ya Kavule, Akagali ka Nemba, Umurenge wa Rweru, we yatangaje ko kwirinda C0vid-19 bigoranye cyane kuko agapfukamunwa gahenze kuko ubwako kagura amafaranga 500 no kugera iyo kagurishirizwaga ari 400 kugenda no kugaruka, amafaranga 900 ngo akaba ari menshi atabasha kuboneka cyane ko muri kano gace kubona imirimo bikomeye.
Mugisha yasabye leta kubegereza udupfukamunwa kandi bakadutangira make byibuze amafaranga 200 kugira ngo buri wese abashe kukagura.
Umuyobozi w’Akarere ka Bugesera Mutabazi Richard yatangaje ko Akarere ka Bugesera nako gashyira mu bikorwa ingamba z’igihugu zo kwirinda Coronavirus, nubwo kwigisha bigikomeje cyane ko harimo ibitari bimenyerewe mu muco nyarwanda, cyane ko aka Karere gafite imirenge 5 ikora ku mipaka, ngo ni urugamba rukomeye ariko yashimangiye ko ubuyobozi bwagerageje gukaza ingamba kugeza ubu muri aka Karere hakaba nta muntu uragaragaraho Covid-19.
Ku kibazo cy’ibura ry’amazi yatangaje ko ari ikibazo kimaze igihe muri Bugesera ariko ubuyobozi bugenda bugishakira igisubizo.
Yagize ati ” kutagira amazi hafi ntibivuze ko wicwa n’indwara, ahubwo abaturage bagomba kwihanganira imvune yo kuyashaka kure, bakihangana bakaramira ubuzima bwabo kuko bidakwiriye kuba impamvu yo kutarwanya icyorezo cya Covid-19.”
Ku kibazo cy’udupfukamunwa turi kure bigatuma kagera ku muturage gahenze, Umuyobozi w’Akarere yabiviuzeho, aho yagize ati “Habayeho gukwirakwiza udupfukamunwa dukoranye na PSF byibuze muri buri Kagali hakaba hari umuntu uducuruza ariko niba hari aho bitubahirijwe tugiye kubigenzura, abaturage batwegerezwe”.
Dr Cyrille Ntahompagaze ukuriye abaganga mu Bitaro bya Nyamata we yatangaje ko abaturage aribo bafite uruhare runini mu kwirinda Covid-19, anatangaza ko ibitaro nabyo byashyizeho ingamba zirimo ubukangurambaga, gukaraba intoki n’isabune kuri buri muntu ugiye kwinjira mu bitaro, guhana intera ndetse no gupima umuriro buri muntu wese winjiye mu bitaro.
Dr Ntahompagaze yatangaje ko mu bipimo 2050 byafashwe mu Karere ka Bugesera nta muntu numwe wagaragayeho Coronavirus.
Kugeza ubu mu Rwanda abarwayi bose ba Covid-19 ni 1081, abakize ni 512, abakirwaye ni 566 mu gihe abamaze kwicwa nayo ari 3.
NIKUZE NKUSI Diane
