Mu birori byaranzwe n’ubunyamwuga n’icyubahiro, abasirikare 81 mu Ngabo z’u Rwanda barangije amasomo y’icyiciro cya kabiri cya kaminuza, bahawe impamyabumenyi zabo mu Ishuri Rikuru rya Gisirikare rya Gako. Ibi birori bikomeye byabaye kuri uyu wa Mbere, tariki 4 Kanama 2025, byateguwe ku bufatanye bwa RDF na Kaminuza y’u Rwanda.
Abarangije barimo 20 bafite ipeti rya “Lieutenant” bize ubuvuzi rusange n’ubuvuzi bw’amenyo, n’abandi 61 bafite ipeti rya ‘Sous-Lieutenant’ bize amasomo atandukanye ajyanye n’ubumenyi rusange n’ubuhanga bwa gisirikare.
Mu ijambo ry’ingenzi, Minisitiri w’Ingabo, Juvenal Marizamunda, yabibukije ko bari kwinjira mu Isi ihindagurika vuba, yuzuyemo ibibazo by’iterabwoba, ibyaha by’ikoranabuhanga n’imihindagurikire y’ikirere.
Yagize ati: “Iyi mpuzankano yanyu ni ikimenyetso cy’icyizere igihugu gifitiye RDF. Ubumenyi mwahawe ni urufunguzo rwo gusigasira umutekano w’u Rwanda ndetse no guhangana n’ibibazo bihangayikishije isi.”
Minisitiri Marizamunda yanashimangiye ko iterambere ry’igisirikare rishingiye ku barimu beza, imyitozo ikomeye n’ibikoresho bihagije. Yabifurije gukomeza kuba intangarugero, bagaharanira iterambere ry’igihugu cyababyaye.
Umugaba Mukuru w’Ingabo, Gen Mubarakh Muganga, Minisitiri w’Uburezi Dr Nsengimana Joseph n’Umunyamabanga Mukuru wa RIB mushya, Col Pacifique Kayigamba Kabanda, bari bitabiriye uyu muhango.
Brig Gen Franco Rutagengwa, Umuyobozi w’Ishuri Rikuru rya Gako yashimye ubushake, ikinyabupfura n’ubuhanga byaranze aba banyeshuri mu gihe cy’amasomo yabo.
Ati: “Aba banyeshuri bagaragaje indangagaciro z’umusirikare nyakuri. Bafite ubushobozi bwo guhagararira igihugu mu bihe bikomeye ndetse no kubaka sosiyete itekanye.”
Mu guha agaciro indashyikirwa, Lt Dr Eugene Parfait Ruhirwa wize ubuvuzi na Sous-Lieutenant Christian Izere wize ibijyanye n’ubumenyi bwa gisirikare, bahembwe nk’abatsinze ku rwego rwo hejuru.
Ishuri Rikuru rya Gisirikare rya Gako rimaze kuba igicumbi cy’uburezi buhanitse mu Ngabo z’u Rwanda. Kuva mu mwaka wa 2015, rifatanya na Kaminuza y’u Rwanda mu gutanga amasomo arimo Ubuvuzi, Ubukanishi, Imibare, Amategeko n’Ubuhanga bwa Gisirikare, bikagirira akamaro mu miyoborere n’umutekano w’igihugu.
INKURU YA TUYISHIME Eric
