Umuringanews

Amakuru y'umumaro

Rwanda: Umubare w’abandura n’abicwa na Covid-19 ukomeje kwiyongera

Kuri uyu wa Gatandatu taliki ya 10 Nyakanga, hatangajwe abantu bashya bakize icyo cyorezo 869, batumye umubare w’abamaze kugikira muri rusange ugera ku 32,006 bangana na 67.1% by’abamaze kucyandura.

Ni mu gihe abarwayi bashya batangajwe ari 830, batumye  abamaze kwandura kuva COVID-19 yagera mu Rwanda bagera ku 47,667. Ikigero cy’ubwandu mu bipimo byafashwe kirabarirwa ku 10%.

Abakirimo kwitabwaho n’abaganga baba bari mu bitaro cyangwa mu ngo bagera ku 15,110 barimo 63 barembye.

Abamaze guhitanwa n’icyorezo cya COVID-19 kuva cyagera mu Rwanda muri Werurwe 2020 bageze kuri 551 barimo abantu 17 bambuwe ubuzima na cyo mu masaha 24 ashize, mu minsi ine ishize hakaba hamaze gupfa abantu 60.

Abo iki cyorezo cyahitanye uyu munsi barimo abagore cumi n’umwe b’imyaka 81, 74, 67, 50, 33 (Kigali), 81 (Rutsiro), 78 (Gicumbi), 75 (Musanze), 74, 70 (Rubavu), 63 (Nyamasheke) n’abagabo batandatu b’imyaka 88, 34 (Kigali), 80, 56 (Kamonyi), 63 (Nyamagabe), 40 (Muhanga).

Inzego z’Ubuzima ziravuga ko abasaga 90% by’abatahuweho virusi bafite ibimenyetso byoroheje cyangwa nta n’ikimenyetso na kimwe bagaragaza, bityo bakaba barimo kuvurirwa mu ngo zabo.  Gusa ubwiyongere bw’abarwayi bwatumye n’ibitaro byari byarafunzwe byongera gufungurwa.

Abarwayi bashya batahuwe barimo abo mu Mujyi wa Kigali 445,  Musanze 47, Rubavu 37, Gicumbi 36, Kamonyi 34, Gakenke 34, Ngororero 28, Huye 22, Rulindo 20, Rwamagana 14, Kayonza 14, Ngoma 13, Burera 12, Rusizi 12, Nyamasheke 12, Nyabihu 11, Muhanga 11, Nyamagabe 9, Kirehe 8, Nyanza 4, Karongi 3, Nyaruguru 3 na Rutsiro 1.

Ibipimo bimaze gufatwa kuva umurwayi wa mbere yatahurwa mu Rwanda ni 1,716,306 birimo 8,295 byafashwe mu masaha 24 ashize.

Uyu munsi, abantu 1,235 ni bo bahawe doze ya mbere y’urukingo rwa COVID-19, bityo abamaze gukingirwa muri rusange bagera ku 394,067.  Ni mu gihe kandi abantu 252,842 bamaze guhabwa doze ya kabiri y’urwo rukingo (AstraZeneca), harimo 262 bayihawe uyu munsi.

Ku Isi, abamaze kwandura COVID-19 muri rusange bararenga  miliyoni 187 barimo abasaga miliyoni 171 bakize ndetse na miliyoni 4 z’abantu bamaze kubura ubuzima kubera icyo cyorezo.

 

NIKUZE NKUSI Diane 

Sangiza abandi iyi nkuru