Kuri uyu wa Kane tariki 26 Werurwe 2020 ibiro ntaramakuru bya Koreya y’Epfo (Yonhap) nibwo byatangaje ko umukecuru w’imyaka 97 yakize neza COVID -19, gusa nta makuru arambuye byigeze bimutangazaho.
Uyu mukecuru akurikiye umusaza w’imyaka 100 wo mu Bushinwa wari watangajwe mu ntangiriro z’uku kwezi nk’uko byari byatangajwe n’Ibiro ntaramakuru by’Ubushinwa (Xinua), aba bombi bakaba babaye abantu bakuze kurusha abandi babashije gukira iki cyorezo.
Mu Rwanda Minisiteri y’ubuzima itangaza ko imaze kubona abantu 50 banduye Coronavirus kuva ku itariki 14 Werurwe 2020 ubwo umuntu wa mbere yasangwagamo iyi ndwara ku butaka bw’u Rwanda, akaba Umuhinde wari uturutse mu mahanga.
Minisiteri y’Ubuzima itangaza ko aba barwayi bose uko ari 50 bamerewe neza nta n’umwe urembye aho bari kwitabwaho n’inzego z’ubuzima hakaba haranashakishijwe abahuye nabo nabo bagasuzumwa kandi bagashyirwa mu kato.
Ishami ry’Umuryango w’Abibumbye ryita ku buzima, OMS ritangaza ko Covid-19 imaze kugera ku bantu 2600 baturuka mu bihugu 46, muri Afurika hasigaye ibihugu 8 byonyine iki cyorezo kitarageramo, harimo u Burundi, Botswana, Ibirwa bya Comores, Lesotho, Malawi (ubu yamaze gutangaza ibihe bidasanzwe nubwo itari yahagera), Sudani y’Epfo, Sao Tome et Principe, Sierra Leone (nayo yatangaje ibihe bidasanzwe).
Coronavirus ikaba imaze kwica abantu 73 muri Afurika mugihe igihugu cyugarijwe kurusha ibindi ku isi ari Ubutaliyani kimaze guhitana abantu 7503.
NIKUZE NKUSI Diane
