Umuyobozi w’Ikigo Nyafurika gishinzwe Kurwanya Indwara “CDC”, John Nkengasong yatangarije Financial Times ko hafashwe icyemezo cyo guhagarika kugura inkingo za AstraZeneca zikorerwa mu Buhinde, kubera uburyo ubu bigoye kuzibona, ahubwo bari mu biganiro byo kugura iza Johnson & Johnson zitangwaho dose imwe umuntu akaba akingiwe byuzuye.
Uyu muyobozi yakomeje yemeza ko ntaho bihuriye n’ibibazo zavuzweho byo kuvura kw’amaraso ko ahubwo ari ukwanga guhangana na gahunda ya Covax igamije gufasha ibihugu bikennye kubona inkingo.
Yavuze ko muri Covax hazakoreshwa inkingo nyinshi za AstraZeneca kandi zizazanwa ahanini muri Afurika, bityo ko batakomeza gusa n’abarushanwa basaba izo nkingo zitari no kuboneka ku bwinshi.
Yagize ati “Intego yacu ni ugukingira 60%. Niba Covax izadufashaho 20%, dushobora gukomeza gushaka izindi nkingo zo kongeraho. Niba Covax iri gukorana na AstraZeneca ngo ibone dose ikeneye, dushobora kumvikana na Johnson & Johnson kugira ngo tubone izisigaye.”
Uretse kuba inkingo zizifashishwa muri Covax ari iza AstraZeneca, u Buhinde buherutse kugabanya izoherezwa hanze kugira ngo habanze hihutishwe ikingira ry’imbere mu gihugu, ibintu bikomeje gutuma urwo rukingo rutaboneka cyane kuko ariho zikorerwa.
Johnson & Johnson iherutse gutangaza ko izaha Afurika inkingo miliyoni 400.
Twabibutsa ko muri Afurika abasaga miliyoni 4,4 ni bo bamaze kwandura COVID-19 muri, miliyoni 3,9 barayikize naho abarenga ibihumbi 115 yarabishe.
NIKUZE NKUSI Diane
