Ishami ry’Umuryango w’Abibumbye ryita ku Buzima “OMS” ryashimye u Rwanda rumaze gukingira COVID-19 abaturage barwo bagera ku 10%. Rukaba rwageze ku ntego y’ uku kwezi kwa Nzeri yashyizweho n’iri shami hagamijwe guhangana n’iki cyorezo.
Dr Salla Ndoungou Ba Umuyobozi w’agateganyo wa OMS mu Rwanda yagize ati: “ Nishimiye ibimaze kugerwaho. U Rwanda rwabaye icyitegererezo mu bikorwa byiza muri aka karere kuva gahunda yo gukingira yatangira muri Werurwe. Ndashimira Guverinoma y’u Rwanda n’abafatanyabikorwa bayo ku bw’imbaraga zabo zihamye zo kurinda abaturage b’u Rwanda COVID-19”.
Muri Gicurasi 2021, Umuyobozi Mukuru wa OMS, Dr Tedros Adhanom Ghebreyesus, yashyizeho intego z’uko ibihugu byo ku isi byazaba bimaze gukingira 10% by’abaturage babyo bitarenze impera z’uku kwezi, hanyuma mu mpera z’Ukuboza hakaba hakingiwe abagera kuri 40%, kugera mu mwaka wa 2022 hagati hakazaba hakingiwe 70%.
OMS yashyizeho iyi ntego kugira ngo ibihugu bigire umwete wo gukingira abaturage babyo mu kurwanya icyorezo cya COVID-19.
Isanga gukingira 10% nibura bizafasha mu kurinda ab’intege nke cyane, byaba 40% hakaba hari icyizere cyo kurinda abakora mu nzego zinyuranye z’ubuzima, abageze mu zabukuru n’abafite ibindi bibazo by’ubuzima. Mu gihe byaba bigeze kuri 70% bikaba intambwe yo gusubira mu buzima busanzwe no gufungura ibikorwa bitandukanye bigamije kuzamura ubukungu.
Icyegeranyo cyatangajwe n’iri shami kigaragaza ko ibihugu bigera kuri 90% byageze ku ntego yo gukungira abaturage 10%, ibigera kuri 70% byageze kuri 40%. Ibihugu 14 gusa byo ku mugabane w’Afurika ni byo bimaze kugeza ku 10%, ibihugu 3 byonyine akaba ari byo byageze kuri 40%.
Iri shami rigaragaza ko kugeza ubu u Rwanda rumaze kubona inkingo za COVID-19 zigera kuri miliyoni 3,4, izigera kuri miliyoni 1,1 rwazibonye binyuze muri gahunda ya COVAX yo korohereza ibihugu kubona inkingo. Hari n’izindi zagiye ziboneka binyuze mu bufatanye n’ibindi bihugu.
OMS ikomeza ishima u Rwanda kubera intego rwihaye yo gukingira abaturage benshi, bigakorwa mu mutuzo hashingiwe ku byiciro kandi bikitabirwa. Ikindi ni uburyo bwakoreshejwe mu gukwirakwiza inkingo mu gihugu hose ku buryo bwihuse hakoreshejwe inzira yo mu kirere, iyo ku butaka ndetse no mu mazi.
Hari kandi kuba u Rwanda rwarafashe iya mbere muri gahunda yo gukorera inkingo zirimo n’iza COVID-19 muri Afurika mu gushaka igisubizo ku buke bwazo nk’ubwagaragaye muri Mata kugeza muri Kamena uyu mwaka.
OMS ivuga ko ibi byose byagezweho biturutse ku buyobozi bwiza iki Gihugu gifite.
Ubuke bw’inkingo za kiriya cyorezo bwakomye mu nkokora gahunda yo gukingira muri Afurika, akaba ari yo mpamvu kugeza ubu abagera kuri miliyoni 54 kuri uyu mugabane ari bo bamaze guhabwa inkingo zose ziteganyijwe.
OMS yijeje u Rwanda ubufatanye mu rwego rwo kugera ku ntego yo gukingira 60 % by’abaturage bitarenze umwaka wa 2022.
ubwanditsi@umuringanews.com
