Mu muhango wo kuremera imiryango 10 y’abarokotse Jenoside yakorewe abatutsi mu 1994 itishoboye yo mu Kagali ka Bitare, Umurenge wa Ngera, mu Karere ka Nyaruguru, igikorwa cyakozwe n’abakozi b’ibitaro bya Kacyiru, Umuyobozi w’ibitaro bya Kacyiru CP Dr Daniel Nyamwasa yamenyesheje abawitabiriye ko urugamba rw’amasasu rwarangiye, ko urusigaye ari ukwibohora ubukene, imirire mibi n’igwingira ryibasira abana, yanemeje ko bishoboka.
CP Dr Nyamwasa yavuze ko iki gikorwa ari umuhigo ngarukamwaka w’abakozi b’ibitaro bya Kacyiru wo gushyigikira Perezida Kagame muri gahunda yo kuremera abatishoboye barokotse Jenoside yakorewe Abatutsi mu 1994.
CP Dr Nyamwasa avuga ko icyo kwishimira ari uko hari amakuru meza yagiye ava mu Turere twaremewe, ko amatungo yatanzwe yororotse kandi agahindura ubuzima bw’abayahawe. Yasabye abagabiwe kwita ku nka bahawe zikororoka maze na bo bakorozanya hagati muri bo.
Ati “Ahari inka imyaka irera, abana bakabona amata n’amavuta bikabarinda kugwingira, urugamba mukwiriye kurwana ubu ni urw’imirere mibi, kugwingira n’ubukene muri rusange”.
Umwe bagabiwe inka yagize ati “Kera twabonaga abapolisi kominali tukirukanka, ariko ubu turabasuhuza tugafatanya mu iterembere. Ndabashimira Perezida Paul Kagame we wongeye kudusubiza ku mata yo kabyara”.
Mu mwaka wa 2014 na 2015 ibitaro bya Kacyiru byaremeye abaturage b’Akarere ka Gasabo, Umurenge wa Rutunga, mu mwaka wa 2018 byaremeye abaturage bo mu Murenge wa Mukura, Akarere ka Huye, muri uyu mwaka wa 2019 haremewe imiryango 10 yo mu Murenge wa Bitare, Akarere ka Nyaruguru.
TUYISHIME Eric
