U Bufaransa bukomeje kwisanga habi kubera imyigaragambyo yibasiye iki igihugu. Muri iyi minsi, hari kuba ishingiye ku rupfu rw’umwana w’imyaka 17 wishwe na Polisi mu gihe mu minsi yashize, habaye indi ishingiye ku bantu batari bashyigikiye impinduka mu itegeko rya Pansiyo.
Imyigaragambyo yatewe n’urupfu rw’umwana warashwe na Polisi ku wa Kabiri w’Icyumweru gishize, imaze guhombya igihugu miliyari 1,1$ ubaze ibintu byangijwe n’abaturage.
Abigaragambya bigabije amashami arenga 400 ya Banki, amaguriro arenga 500 n’ibindi bikorwaremezo nk’uko byatangajwe na Minisitiri w’Imari w’u Bufaransa, Bruno Le Maire.
Le Maire yavuze ko inzu zikorerwamo ibikorwa by’ubucuruzi zimaze kwangizwa kuva iyi myigaragambyo yatangira, zirenga 1000. Ba nyiri ibyo bikorwa, bijejwe na Guverinoma ko bazahabwa ubufasha.
Gusa Le Maire yavuze ko iyi myigaragambyo itazahungabanya ubukungu bw’igihugu.
Imvano yayo ni urupfu rw’umwana w’imyaka 17 witwa Nahel Merzouk warashwe na Polisi ikorera mu muhanda i Paris. Abaturage bahise barakara, bigabiza igihugu cyose batangira kwigaragambya basaba ko Nahel ahabwa ubutabera.
INKURU YANDITSWE NA KAYITESI Ange
