Kuri uyu wa gatandatu tariki 11 Gashyantare 2023, Urukiko rwa gisirikare rwa Goma rwateraniye i Sake muri teritwari ya Masisi muri 25km iburengerazuba bwa Goma, nyuma y’ibyabaye kuwa kane muri iyo centre, rukatira abasirikare barindwi b’ingabo za DR Congo urwo gupfa rubahamije ibyaha birimo ubugwari’ no guca igikuba muri rubanda.
Umwe mu banyamakuru bitabiriye iri buranisha yabwiye BBC ko aba basirikare, bari bafite abunganizi, bahamijwe ibyaha by’“ubugwari, guca igikuba, gukomeretsa no gutagaguza amasasu”.
Umushinjacyaha wa gisirikare yumvikana arega aba basirikare “guta urugamba” “n’ubugwari imbere y’umwanzi” (inyeshyamba za M23), “bakagenda barasa nta mpamvu mu mujyi wa Sake na Mubambiro”.
Mu guhunga kwabo, aba basirikare ngo baciye igikuba muri rubanda rwa Sake maze nabo bahungira i Goma na Minova, mu gihe nyamara Sake ikigenzurwa n’ingabo za leta.
Aba basirikare b’ipeti rya kaporali bahakanye ibyaha, kandi ababunganira bavuzeko bazajuririra igihano abakiriya babo bakatiwe, nk’uko ubutegetsi bw’intara ya Kivu ya ruguru bwabitangaje.
Kuwa kane, mu mirwano ishyamiranyije ingabo za leta n’umutwe wa M23 mu nkenegero za Sake abatuye uwo mujyi muto benshi barahunze bakeka ko M23 yinjiye muri iyo centre, bivugwa ko ibi byatewe n’abo basirikare ubwo bahanyuraga bataye urugamba bahunga.
Umushinjacyaha yavuze ko muri uko guhunga mu bwoba n’igikuba kwa rubanda abantu babiri bapfuye abandi bane bagakomereka, ari nayo mpamvu yareze aba basirikare ubwicanyi no gukomeretsa.
Mu Ugushyingo(11) gushize urukiko rwa gisirikare rwa Goma rwakatiye abandi basirikare batatu urwo gupfa rubahamije “guhunga urugamba” barwana na M23 bagaca igikuba muri rubanda rwahise ruhungira mu nkambi ya Kanyarucinya.
Kugeza ubu igihugu cya Repubulika Iharanira Demokarasi ya Congo iracyatanga igihano cy’urupfu mu mategeko yayo ariko giheruka gushyirwa mu ngiro mu mwaka wa 2003.
INKURU TANDITSWE NA TUYISHIME Eric
