Uwahoze ari perezida wa Sudan, Omar al-Bashir wari umaze imyaka igera kuri itatu afunze kuri ubu ari mu bitaro aho yimuriwe avanywe muri gereza, amashusho yashyizwe hanze amugaragaza aseka atembera mu bitaro asuhuza abarwayi akaba yateje impagarara.
Abanyamategeko ba Bashir bemeje ko koko uwo bunganira yimuriwe mu bitaro kubera ko ubuzima bwe butameze neza nk’uko Reuters yabitangaje.
Amashusho yagiye hanze, niyo ya mbere ya Bashir ashyizwe ku mbuga nkoranyambaga atari mu rukiko nyuma yo guhirikwa ku butegetsi.
Abdelrahman Alkhalifa wunganira Bashir, yavuze ko urukiko rwemeje ko Bashir yimurirwa mu bitaro kugira ngo babashe kwita ku buzima bwe butifashe neza.
Abanyamategeko ba Bashir bari bamaze igihe basaba ko yimurirwa mu bitaro bya gisirikare ari naho aherereye ubu, kugira ngo arindwe kuba yakwandura Covid-19 kandi bakurikiranire hafi ikibazo cy’umuvuduko w’amaraso afite.
Nubwo hari abagaragaje kwifuriza Bashir koroherwa, ku mbuga nkoranyambaga hari abagaragaje ko abayeho ubuzima bwiza budakwiriye umuntu ukekwaho ibyaha bikomeye.
Bashir akurikiranyweho ibyaha bitandukanye birimo ruswa no guhonyora uburenganzira bwa muntu, kuri ubu ubutegetsi bwe bukaba bwarasimbuwe n’abasirikare bamuhiritse ku butegetsi.
Ange KAYITESI
