Kuri uyu wa kabiri tariki 15 Nzeli 2020, nibwo biteganyijwe ko isoko benshi bita mpuzantara ahazwi nko kwa Mutangana rifungurwa hamwe n’amazu y’ubucuruzi arikikije, ibi bikaba byatangajwe n’ubuyobozi bw’Umujyi wa Kigali, ariko hakaba hafashwe ingamba zihamye zo guhangana na Covid-19.
Ubuyobozi bw’Umujyi wa Kigali bwasobanuye ko iri soko rigiye gufungurwa nyuma y’igenzura ryakozwe n’inzego z’ubuzima ndetse n’imyiteguro y’abasanzwe barikoreramo mu rwego rwo gushyira mu bikorwa ingamba zo kwirinda icyorezo cya COVID-19.
Kugira ngo ubucucike bugabanuke mu isoko ryo Kwa Mutangana, amaseta yongerewemo atari asanzwe mu myubakire yaryo agomba kuvanwaho ndetse n’abacururizaga mu nzira ku buryo umuntu yinjira bimugoye bakahava.
Umujyi wa Kigali wasobanuye ko abarikoreragamo ubucuruzi bw’imboga n’imbuto n’ababiranguza bo bazakomeza gukorera ku Giticyinyoni. Abaranguzaga ibirayi bo bazakomeza gukorera mu Nzove.
Biteganyijwe ko mu isoko hazajya hakoreramo 50% by’abari basanzwe barikoreramo, bakazajya basimburana, mu rwego rwo kwirinda ikwirakwira rya COVID-19.
Iki cyemezo gifashwe nyuma y’uko hashize iminsi igera kuri 11 hafunguwe isoko ryo mu Mujyi (Kigali City Market) yari yarafungiwe rimwe guhera tariki 17 Kanama 2020, nyuma y’uko byari byemejwe n’inzego z’ubuzima ko ayo masoko yagaragayemo umubare munini w’abamaze kwandura icyorezo cyaCOVID.
NIYONZIMA Theogene
