Kuri uyu wa Kabiri tariki ya 28 Nyakanga 2020, Minisiteri y’Ubuzima yatangaje ko habonetse abarwayi bashya 47 b’icyorezo cya Koronavirusi (COVID-19), mu bipimo 3,521 byafashwe mu masaha 24 ashize, hataha abantu 30 bakize neza.
Umubare w’abamaze gukira ugera kuri 1,005 mu 1,926 bamaze gutahurwaho icyo cyorezo mu Rwanda, mu bipimo 251,815 bimaze gufatwa kuva umurwayi wa mbere yatahurwa mu Rwanda.
Abarwayi bashya batahuwe mu bapimwe mu midugudu iri mu kato n’abahuye n’abanduyemu Mujyi wa Kigali: 36, Rusizi: 5, Nyamasheke: 4, Rulindo: 2. Bose bahise bashyirwa mu kato aho bakomeje kwitabwaho n’Abanyarwanda.
Kugeza ubu abakirimo kwitabwaho n’abaganga bageze kuri 916, iki cyorezo kikaba kimaze gutwara ubuzima bw’abarwayi batanu mu Rwanda.
Igikorwa cyo gupima abantu mu buryo bwa rusange mu Gihugu kirakomeje, ndetse imidugudu y’Akarere ka Nyamasheke n’iy’aka Nyamagabe ikomeje gahunda ya Guma Mu Rugo kimwe n’imwe mu mirenge y’Akarere ka Rusizi n’imidugudu yo muri Kigali.
Mu tundi turere, ingendo zihuza Intara n’Umujyi wa Kigali n’ibikorwa bitandukanye by’ubuzima busanzwe birakomeje.
Kuri ubu ubishatse wese arimo gupimwa COVID-19, akamenya uko ahagaze ndetse yasangwa ari muzima agahabwa ikemezo kemeza ko ari muzima. Ku ikubitiro, kuri uyu wa Kabiri hakiriwe abantu barenga 100 basabye gupimwa ku bushake.
Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.
Imibare yatangajwe ku rwego mpuzamahanga yerekana ko muri Afurika abamaze kwandura COVID-19 barenga ibihumbi 859 barimo abarenga ibihumbi 506 bakize n’abandi barenga ibihumbi 18 bahitanywe na cyo. Abamaze kwandura ku Isi bararenga miriyoni 16, barimo abakize barenga miriyoni 10 n’abapfuye barenga ibihumbi 661.
Ubwanditsi
