Impamvu zivugwaho cyane mu gutuma abana bava mu ishuri twahuza na raporo ya Minisiteri y’Uburezi yerekana ko umubare w’abana bata ishuri wiyongera harimo kuba abana bajya mu mirimo ibabuza kwiga rimwe na rimwe bayoherezwamo n’ababyeyi, guteshuka ku nshingano kw’ababyeyi, amakimbirane yo mu miryango, imyitwarire y’abana banga kujya ku ishuri bakigira inzererezi hamwe n’ubukene aho usanga ababyeyi bananirwa kugurira umwana ibikoresho by’ishuri bikaba byaca umwana intege.
Tugarutse kuri raporo Minisiteri y’Uburezi iheruka gutangaza igaragaza ko mu mwaka w’amashuri wa 2017/2018 abanyeshuri baretse kwiga mu mashuri abanza bageze kuri 6.7% bavuye kuri 5.6% mu mwaka wa 2016/2017 mu gihe mu 2015/2016 bari kuri 5.7%.
Mu mashuri abanza iyi raporo igaragaza ko abahungu aribo baza imbere mu guta amashuri ugereranyije na bagenzi babo b’abakobwa naho mu yisumbuye abakobwa bakaza imbere.
Mu mwaka wa 2017/2018 abahungu bataye ishuri bari 7% abakobwa ari 6.3%, mu 2016/2017 abahungu bari 5.9% abakobwa ari 5.3% mu gihe mu mwaka wawubanjirije abahungu bari 6% abakobwa ari 5.4%.
Iyo raporo igaragaza ko mu mashuri yisumbuye abayavuyemo mu mwaka w’amashuri wa 2017/2018 bageze kuri 5.8% bavuye kuri 4.4% mu 2016/2017 mu gihe mu 2015/16 bari kuri 4.5%.
Bitandukanye no mu mashuri abanza, mu yisumbuye ho bigaragara ko abakobwa aribo bava mu ishuri cyane kurusha abahungu.
Mu mwaka wa 2017/2018, abakobwa bavuye mu ishuri bari 6.1% abahungu ari 5.5%, mu 2016/2017 abakobwa bari 4.7% abahungu ari 4% mu gihe mu 2015/2016 abakobwa bari 4.8% abahungu ari 4.1% gusa.
UWIMPUHWE Egidia
