Kuri uyu wa Gatatu tariki ya 17 Nyakanga 2019, ubuyobozi bwa gisikare bumaze iminsi ku butegetsi muri Sudan n’abigaragambya bashyize umukono ku masezerano yo gusangira ubutegetsi.
Aya masezerano aje ari nk’igisubizo ku bigararagambya batahwemye kugaragagaza ko bifuza ubutegetsi buyobowe na rubanda aho kuba abasirikare.
Ubushyamirane hagati y’abasirikare n’abaturage bwaje nyuma yuko uwahoze ari Perezida Omar al-Bashir ahiritswe ku butegetsi muri Mata 2019.
Umuyobozi Wungirije w’Inama ya gisirikare iyoboye Sudan, Mohamed Dagalo, yatangarije ibiro ntaramakuru by’Abafaransa AFP ko amasezerano yasinywe ari aya mateka kuri Sudan.
Ibrahim al-Amin uyoboye abigaragambya yemereye AFP ko hari amasezerano hagati yabo n’abasirikare yashyizweho umukono, avuga ko ibijyanye n’Itegeko Nshinga byo bazabiganoraho kuwa Gatanu tariki ya 19 Nyakanga 2109.
Umuryango wa Afurika Yunze Ubumwe n’abunzi bo muri Ethiopia ni bamwe mu bagize uruhare mu guhuza uruhande rw’abigaragambya n’abasirikare bakagera naho basinyana amasezerano yo gusangira ubutegetsi.
Mu masezerano bemeranyijwe ko Leta y’inzibacyuho izaba igizwe n’abasirikare batanu n’abasivile batandatu.
Amezi 21 ya mbere azayoborwa n’uruhande rw’abasirikare n’aho andi 18 ayoborwe na rubanda mbere yuko haba amatora.
UWIMPUHWE Egidia
