Kuri uyu wa Gatanu tariki ya 22 Werurwe 2019, ubwo hizihizwaga umunsi mpuzamahanga wo kurwanya igituntu wabereye mu Murenge wa Rukoma, mu Karere ka Kamonyi, mu Ntara y’Amajyepfo, Umuyobozi w’Akarere ka Kamonyi, Kayitesi Alice yatangaje ko mu myaka itanu, abagera ku 9734 aribo bipimishije indwara y’igituntu, muri bo 222 basanzwe baramaze kurwara igituntu igisanzwe naho abandi 2 bari barwaye igituntu cy’igikatu.
Muri abo bakisuzumishije, Kayitesi yavuze ko 36.3% bangana na 4124 bakisuzumishije bigizwemo uruhare n’abajyanama b’ubuzima barimo 83 bagisanganye ariko ko bose bavuwe bagakira.
Umunsi mpuzamahanga wo kurwanya igituntu muri uyu mwaka wahawe insanganyamatsiko igira iti “Igihe kirageze isuzumishe igituntu, kiravurwa kigakira.”
Twabibutsa ko muri kano Karere ka Kamonyi bafite ubushobozi bwo gupima no kuvura igituntu kuko harimo ibitaro bya Rukoma, ibigo nderabuzima 13 birimo bitanu bisuzuma bikanapima indwara y’igituntu, ibindi bifite ubwo gutanga imiti yacyo gusa.
TUYISHIME Eric
