Mu birori byabereye muri Kigali Marriott Hotel ku mugoroba wo kuri uyu wa gatandatu tariki 8 Nzeli 2018, bifite abakemurampaka bagera muri bane bagombaga gutanga amanota ku barushanwa bahatanaga bagera kuri 20, abakobwa 10 n’abasore 10, Rosine Mukangwije na Nshongore Divique nibo bahize abandi umwe aba nyampinga undi aba rudasumbwa mu bijyanye n’ubusirimu mu Rwanda muri 2018.
Ibi birori bikaba byatangiye bikereweho amasaha agera kuri 2 kuko byagombaga gutangira saa kumi n’ebyiri ariko saa mbiri zirengaho iminota nibwo MC Phil Peter yageze imbere y’abantu atangira gutanga ikaze.
Abarushanwa babanje kwiyerekana mu myenda isanzwe hanyuma baza kugaruka mu myenda ya kinyafurika. Nyuma yo kwiyerekana mu mwambaro wa kinyafurika, abahatana biyerekanye bambaye imyenda y’ibirori, abakobwa bambara amakanzu maremare, mu gihe abasore bari bambaye amakoti.
Nyuma yo kwiyerekana hakurikiyeho umwanya w’ibibazo aho buri umwe yabazwaga mu rurimi ahisemo hagati y’ikinyarwanda, igifaransa ndetse n’icyongereza. Nyuma yabyo hahise hatangazwa abakobwa 3 n’abasore 3 bagomba gukomeza bigira imbere. Abakobwa ni Tuyishime Bella, Rosine Mukangwije na Ingabire Janet. Abasore ni Mukundwa Amir, Nshongore Divique na Twagira Prince Henry.
Mbere yo gutangaza muri aba 3 abegukanye umwanya wa 1, habanje gutangazwa Miss na Mr Popularity, abo babaye Umulisa Divine ndetse na Mukundwa Amir. Hamaze gutangazwa abo hahise hatangazwa ibisonga bya kabiri, abo ni Tuyishime Bella na Mukundwa Amir. Ibisonga bya mbere ni Ingabire Janet na Twagira Prince Henry.
Naho Miss Elegancy akaba Mukangwije Rosine, Mr Elegancy we akaba ari Nshongore Divique nk’uko twari twabitangaje hejuru.
NYANDWI Benjamin
