Uretse izo nkingo zamaze kugera i Kigali, uyu munsi nimugoroba u Rwanda rurakira izindi doze 102,960 z’urukingo rwa Pfizer, nk’uko bivugwa na Minisiteri y’ubuzima mu itangazo yasohoye.
Iyi Minisiteri yatangaje ko izo doze zose zizaterwa abantu 171, 480 bashyizwe mu cyiciro cy’abafite ibyago byinshi, mu gihe gukingira bitangira ku wa Gatanu tariki 5 Werurwe 2021; aho gukingira biteganyijwe ko bizahera ku bakozi mu nzego z’ubuzima, abarengeje imyaka 65 y’amavuko, abasanganywe izindi ndwara zidakira, n’abandi bakora mu kazi ko guhangana na Covid-19.
Ni mu gihe muri iyo gahunda ya Covax kandi mu ijoro ryacyeye, Kenya yakiriye doze miliyoni 1.02 z’uru rukingo rwa AstraZeneca, naho Repubulika iharanira demukarasi ya Congo yakira doze miliyoni 1.7 z’urwo rukingo.
Ni mu gihe kandi muri rusange nk’uko byatangajwe n’Ishami ry’umuryango w’abibumbye ryita ku buzima (OMS) mu kwezi gushize, ibihugu byo mu karere bizakira doze azikurikira:
-DR Congo: 6,948,000
– Kenya: 4,176,000
– Rwanda: 1,098,960 (AstraZeneca na Pfizer)
– South Sudan: 864,000
– Uganda: 3,552,000
Mu kwezi gushize, u Rwanda rwakingiye abantu rukoresheje inkingo bivugwa ko ari iza Pfizer, zari doze nkeya rwabonye mu bufatanye mpuzamahanga, nk’uko byavuzwe na Minisiteri y’ubuzima.
Kugeza ubu Rwanda hamaze gutangazwa abantu barenga 19,000 banduye Covid-19 na 265 imaze kwica, gusa mu itangazo, Minisitiri w’ubuzima Dr Daniel Ngamije yavuze ko U Rwanda rufite intego yo gukingira 30% by’abaturage kugera mu mpera za 2021, na 60% kugera ku mpera ya 2022.
Covax ni gahunda ishyigikiwe n’Umuryango w’abibumbye (ONU) yahurije hamwe ibihugu bikagura inkingo ku nganda zazikoze hagamijwe cyane cyane kuzigeza ku bihugu bidafite amikoro yo kuzigurira ku isoko, aho iyi gahunda iteganya gutanga doze miliyari ebyiri ku bihugu 190 mu gihe kitarenze umwaka.
ubwanditsi@umuringanews.com
