REG WBBC ikomeje kwitegura Imikino Nyafurika ya ‘FIBA Africa Women Basketball League’ yongeye Anastasia Hayes Faith na Chelsea Jennings mu bakinnyi izifashisha muri iri rushanwa riteganyijwe kubera i Kigali tariki 28 Ukwakira kugeza ku wa 4 Ugushyingo 2023.
Iri rushanwa rihuza amakipe yabaye aya mbere iwayo kuri iyi nshuro rizitabirwa n’amakipe 10 yo muri aka Karere. U Rwanda ruzahagararirwa na APR WBBC yegukanye Igikombe cya Shampiyona ndetse na REG WBBC yabaye iya kabiri.
Mu rwego rwo kwitegura neza iri rushanwa, Ikipe ya Sosiyete y’Igihugu ishinzwe Ingufu yaguze Umunyamerika Anastasia Hayes Faith usanzwe ukinira Mississippi State Athletics Women’s Basketball yo mu Cyiciro cya Mbere muri Shampiyona ya za Kaminuza muri Leta Zunze Ubumwe za Amerika.
Uyu mu ‘Point Guard’ ni umwe mu bakinnyi beza muri iyi shampiyona kuko abarirwa amanota 15, rebounds enye n’imipira itanu yavuyemo amanota kuri buri mukino. Si ibyo gusa kuko mu 2021 yabaye Umukinnyi Mwiza w’Umwaka.
Undi mukinnyi wasinyishijwe na REG WBBC ni Chelsea Jennings. Uyu Munyamerika w’imyaka 29 wakunze gukina mu bihugu byinshi byiganjemo ibyo ku Mugabane w’u Burayi nka Denmark, Suède, u Budage, u Bugereki no mu Misiri.
Aba bakinnyi bombi bageze mu Rwanda ndetse batangiye gukorana imyitozo n’ikipe aho basanze abandi isanzwe igenderaho nka Micomyiza Rosine ‘Cissé’, Kalanga Betty na Umwizerwa Faustine.
Andi makipe azitabira iri rushanwa ni Vijana Queens na JKT Stars (Tanzania), Nile Legends (Sudani y’Epfo), JKL Lady Dolphins na UCU Lady Canons (Uganda), Kenya Ports Authority na Zetech University (Kenya) na Gladiators (Burundi).
Mu mwaka ushize, iyi mikino yabereye i Dar es Salaam muri Tanzania, aho REG WBBC yasoje ku mwanya wa kane nyuma yo gutsindwa na APR WBBC.
Amakipe atatu ya mbere muri iri rushanwa azabona itike y’Imikino Nyafurika “FIBA Africa Champions Cup” izabera i Cairo mu Misiri tariki 8-17 Ukuboza 2023.
INKURU YANDITSWE NA KAYITESI Ange
