Minisiteri y’Ubuzima muri Kenya, yatangaje ko umunyeshuri wari warashyizwe mu kato mu bitaro bya Kenyatta National Hospital (KNH), avuye Guangzhou mu Bushinwa, byaje kugaragara ko adafite virusi ya Coronavirus.
Uyu munyeshuri yari yashyizwe mu kato muri ibi bitaro nyuma yo kuva mu Bushinwa mu Mujyi wa Wuhan, wabonetsemo bwa mbere virusi ya Coronavirus imaze kwica abantu 304 abandi ibihumbi 14 bakaba bamaze kwandura.r
Umunyamabanga Nshingwabikorwa muri Minisiteri y’Ubuzima ya Kenya, Sicily Kariuki, yavuze ko ibizamini byakorewe muri Afurika y’Epfo.
Yagize ati “Ndemeza ko ibizamini by’umuntu wakekwagwaho kugira iyi virusi byoherejwe muri Afurika y’Epfo, biza bigaragaza ko ari muzima.”
Uyu muyobozi yavuze ko buri muntu wese waba yarakoze urugendo rwerekeza mu Bushinwa akaba agaragaza ibimenyetso bidasanzwe nk’ibicurane n’ibindi, yajya ku kigo nderabuzima kugira ngo hakorwe isuzuma.
Daily Nation yavuze ko uyu munyeshuri uri mu kigero cy’imyaka 20, yari yagiye mu Bushinwa akoresheje indege ya Kenya Airways.
Yavuye mu Mujyi wa Wuhan tariki 20 Mutarama aca mu Mujyi wa Guangzhou na Bangkok muri Thailand tariki 27 Mutarama, agera ku Kibuga cy’Indege cya Jomo Kenyatta International Airport (JKIA) tariki 28 Mutarama uyu mwaka.
Akigera mu gihugu yahise ajyanwa mu bitaro.
Ishami ry’Umuryango w’Abibumbye ryita ku buzima, OMS, rivuga ko abantu barenga 300 aribo bamaze gupfa, mu gihe abandi ibihumbi 14 bamaze kwandura iyi virusi yatangiriye mu Bushinwa mu Mujyi wa Wuhan ari nawo wugarijwe cyane.
Uyu muryango usaba buri gihugu gukorera mu mucyo no gutanga amakuru y’ukuri ajyanye n’iyi virusi no gutegura ahantu bashobora gushyira uwagaragaweho n’iyi virusi.
Kugeza ubu nta gihugu ku mugabane wa Afurika kiragaragaramo iyi virusi.
Ibimenyetso by’indwara ya Coronavirus birimo kugira umuriro, gukorora no guhumeka nabi.
Umuntu yanduzwa Coronavirus n’uwayanduye, akaba yandurira mu mwuka wahumetswe n’uwakoroye ayanduye.
Yandura kandi iyo umuntu akoze ku wayanduye cyangwa amusuhuje; iyo umuntu akoze ku kintu cyangwa ahantu hari iyo virusi noneho agakora ku munwa, ku izuru cyangwa ku maso mbere yo gukaraba intoki ndetse rimwe na rimwe ishobora kwandurira mu mwanda wo mu musarani.
@umuringanews.com
