Imirwano yongeye kubura mu burasirazuba bwa Repubulika ya Demokarasi ya Congo hagati y’imitwe ishyigikiye ingabo za leta, ku ruhande rumwe, n’inyeshyamba zo mu mutwe wa M23, ku rundi ruhande.
Abahatuye bavuga ko kuva ku wa gatandatu inyeshyamba zafashe umujyi wa Kitshanga mu ntara ya Kivu ya Ruguru.
Radio yo muri ako gace yatangaje ko abantu benshi bajyanwe mu bitaro bafite ibikomere byatewe n’amasasu.
Ukora mu rwego rw’umutekano utifuje gutangazwa izina yabwiye ibiro ntaramakuru AFP ati: “Inyeshyamba ziri i Kitshanga kandi turimo kugerageza kubona uburyo bwo kwisubiza umujyi.”
Mu bihe bya vuba aha bishize, ako gace kagiye kagenzurwa n’impande zitandukanye.
Imirwano yongeye kubura kuva mu byumweru bitatu bishize, nyuma y’agahenge k’amezi atandatu. Kitshanga mbere yagenzurwaga n’ingabo z’akarere k’Afurika y’uburasirazuba (EACRF).
Uwo ukora mu rwego rw’umutekano rwa DR Congo yanavuze ko ku cyumweru imirwano yari irimo kubera muri teritwari ya Rutshuru ihana imbibi na Kitshanga, muri Kivu ya Ruguru.
Kitshanga, muri teritwari ya Masisi, iri ku ntera ya kilometero 80 mu majyaruguru ashyira uburengerazuba bwa Goma, umurwa mukuru wa Kivu ya Ruguru.
Bitangazwa henshi – nko muri raporo y’inzobere z’Umuryango w’Abibumbye – ko M23 ifashwa n’u Rwanda, ikirego ubutegetsi bw’i Kigali buhakana.
SOURCE: BBC
