OPC1 Gilbert Ngendankazi, wari ukuriye igipolisi muri Komini ya Giharo, mu majyepfo y’uburasirazuba bw’u Burundi , yatawe muri yombi kuri uyu wa Kane tariki 6 Kamena 2020, ashinjwa uruhare mu kwiba, kwambura ku ngufu no kwica bamwe mu barundi bataha baturuka mu buhungiro mu gihugu cya Tanzania.
Amakuru aturuka mu bushinjacyaha agira ati “Yatunzwe urutoki n’abandi bantu bafunzwe bazira ubwambuzi, ubugizi bwa nabi no kwica Abarundi baturuka muri Tanzania”.
Mu cyumweru gishize, abandi bantu umunani bose b’abasivili, batawe muri yombi muri Komini Giharo ku mpamvu nk’izi, kuri ubu bakaba bafungiye muri kasho z’ubushinjacyaha bwa Makamba.
Aba biyongera ku nsoresore z’Imbonerakure zisaga 10, abayobozi b’ibanze na bamwe mu bashinzwe umutekano nabo bakurikiranwe muri dosiye nk’iyi, kuri ubu bafungiye muri Gereza Nkuru ya Murembwe, mu Ntara ya Rumonge.
Igipolisi n’ubushinjacyaha byari byifuje ko aba bahita batangira kuburanishwa bagitabwa muri yombi (Icyo bita mu Gifaransa “un procès de flagrance”), ariko Urukiko rw’Ubujurire rwa Makamba rufata icyemezo ko urubanza rwakurikira imigendekere y’urubanza rusanzwe.
