Perezida Mohamed Bazoum wahiritswe ku butegetsi tariki 26 Nyakanga bikorwa n’abasirikare bari bashinzwe kumurinda, kugeza ubu we n’umugore we hamwe n’umuhungu wabo bafungiwe mu nyubako irimo ibiro bya Perezida, mu gihe amahanga akomeje gusaba ko asubizwa ku butegetsi, ariko bikaba binugwanugwa ko hatagize igikorwa inzara ishobora kubivugana ndetse banabayeho mu buzima bubi.
Kugeza ubu uyu muryango wa perezida Bazoum byatangajwe ko nta muriro w’amashanyarazi ugera aho bafungiwe ndetse n’ibiribwa basigaranye ni umuceri n’ibindi bifunze nk’uko umwe mu bajyanama ba Bazoum utifuje gutangazwa izina yabimenyesheje itangazamakuru.
Ishyaka rya Bazoum naryo ryasohoye itangazo ryemeza ko imibereho ye n’umuryango we iri mu kaga, ndetse ko nta n’amazi ahagije mu nzu babamo ahari.
Kuri uyu wa Kabiri Ushinzwe ububanyi n’amahanga bwa Leta Zunze Ubumwe za Amerika, Antony Blinken yavuganye na Bazoum, nyuma asaba abamuhiritse guharanira ko umutekano we n’umuryango we witabwaho.
Mu gihe amahanga akomeje gusaba ko Bazoum asubizwa ku butegetsi, igisirikare cyamuhiritse cyo cyatangiye gushyiraho inzego nshya zisimbura izari izihari ndetse kuri uyu wa Mbere hatangajwe Minisitiri w’Intebe mushya ugomba gushyiraho Guverinoma.
Abo basirikare bahiritse ubutegetsi kandi banze kwakira intumwa z’Umuryango wa Afurika y’Iburengerazuba n’iza Loni zari zigiye i Niamey kumvikanisha impande zitavuga rumwe.
INKURU YANDITSWE NA TUYISHIME Eric
