Uwahoze ari Perezida wa Leta Zunze Ubumwe bw’Amerika Donald Trump yatangaje ko yiteze gufungwa kuwa kabiri tariki 21 Werurwe, asaba abakunzi be ko batangira imyigaragambyo.
Hagati aho, umunyamategeko we avuga ko nta butumwa bwatanzwe n’abashinzwe umutekano, akavuga ko amagambo y’uyu wahoze ari umukuru w’igihugu ashyingiye ku bivugwa mu binyamakuru.
Abacamanza bamaze igihe bashaka uburyo baburanisha Trump, amakuru avuga ko bishobora kuba mu cyumweru gitaha.
Mu gihe yaburanishwa, byaba bibaye ubwa mbere uwahoze ari umukuru w’igihugu cya Amerika agejejwe imbere y’urukiko mpanabyaha.
Uru rubanza rushingiye cyane cyane ku mafaranga avugwa ko yaba yaratanzwe n’umunyamategeko we mu izina rya Trump akayaha icyamamare mu gukina filimi z’urukozasoni (porn) kizwi ku izina rya Stormy Daniels, imbere y’amatora y’umukuru w’igihugu yo mu 2016.
Ni rumwe mu manza zitari nke Trump w’imyaka 76 arimo arakorwako iperereza, n’ubwo nta na rumwe ruramuhama kandi hose akomeza avuga ko nta cyaha yakoze.
Trump yiyemeje gukomeza kwiyamamaza kwe mu matora y’umukuru w’igihugu ahagarariye aba Repubulikani mu mwaka wa 2024, n’ubwo yakurikiranwa n’ubutabera.
Ejo hashize kuwa gatandatu, Trump yanditse ku rubuga nkoranyambaga rwa Truth Social ko “amabanga yasohotse mu buryo bunyuranye n’amategeko” yo mu biro by’umucamanza w’akarere ka Manhattan “yerekana” ko ashobora gufungwa ku wa kabiri.
Umukuru w’inteko ishinga amategeko ya Amerika, umu Repubulika Kevin McCarthy, yamaganye iri perereza,avuga ko “Umucamanza w’akarere arimo gukoresha nabi ububasha bwe”.
BBC
