Urukiko Rukuru rwa Tokyo mu Buyapani kuri uyu wa Mbere, rwategetse ko Iwao Hakamada wakatiwe igihano cyo gupfa mu 1968, urubanza rwe rusubirwamo ndetse mu gihe rugitegerejwe akaba arekuwe.
Ni icyemezo cyashimishije abantu b’ingeri zitandukanye nk’umuryango we n’imiryango mpuzamahanga irengera uburenganzira bwa muntu.
Mu mateka y’Isi bivugwa ko Hakamada ari we muntu umaze imyaka myinshi muri gereza akatiwe igihano cy’urupfu, nyuma y’uko yari yashinjwe kwica umuryango w’uwari umukoresha we.
Uyu mugabo w’imyaka 87 yari umuteramakofi yakatiwe iki gihano nyuma yo gushinjwa kwica uwari umukoresha we n’umugore n’abana babiri babo, nyuma hakaza kugaragara amaraso ku myenda ye bikavugwa ko ariwe wabishe.
Urubanza rw’uyu mugabo rwagiye rusubirwamo kuko abamwunganira bagaragazaga ko ibi atari ibimenyetso byemeza ko ariwe wishe uyu muryango.
Urukiko uyu munsi rwemeje ko urubanza rwe rugiye kongera kwiganwa ubushishozi ndetse akaba arekuwe.
INKURU YANDITSWE NA IHIRWE Chris
