Urutonde Perezida wa Tanzania, Samia Suluhu Hassan yashyizweho mu bagore 100 bakomeye ku isi by’umwihariko urw’abagore bagaragaje ibikorwa bidasanzwe mu mwaka wa 2022, akaba ari ku mwanya wa 95.
Ikinyamakuru Forbes cyatangaje ko bimwe mu byatumye Perezida Suluhu ashyirwa kuri uru rutonde ari imbaraga yakoresheje mu guhangana n’icyorezo cya COVID-19 muri Tanzania kandi cyari cyarirengagijwe n’uwamubanjirije, Dr John Pombe Magufuri.
Yashyizwe kuri uru rutonde kandi kubera imbaraga yakoresheje mu guteza imbere uburinganire, uburezi, ubuzima, imiyoborere myiza ndetse n’ibijyanye n’amahoro.
Uru rutonde rugaragaraho abandi bagore bakomeye mu myanya itandukanye barimo Perezida wa Komisiyo y’Umuryango w’Ubumwe bw’u Burayi, Ursula von der Leyen, Visi Perezida wa Leta Zunze Ubumwe za Amerika, Kamala Harris, Melinda French Gates wabaye umugore wa Bill Gates, Oprah Winfrey, Perezida w’Inteko Ishinga Amategeko ya Amerika, Nancy Pelosi, Rihanna, Beyonce na Minisitiri w’Intebe wa Barabados, Mia Amor Mottley.
Ni inshuro ya kabiri Perezida Suluhu agaragaye kuri uru rutonde kuko yari yaje no kurwasohotse mu 2021.
Samia Hassan wari usanzwe ari Visi Perezida wa Tanzania, yarahiriye kuba Perezida mu gitondo ku wa Gatanu tariki 19 Werurwe 2021, nyuma y’urupfu rwa John Pombe Magufuri.
Samia Suluhu Hassan yagiye mu mateka nk’umugore wa mbere uyoboye Tanzania, ndetse akaba ari uwa kabiri muri Afurika y’Uburasirazuba ubashije kuba Perezida, nyuma y’Umurundi Sylvie Kinigi, wayoboye u Burundi kuva muri Nyakanga 1993 kugera Gashyantare 1994.
INKURU YANDITSWE NA KAYITESI Ange
