Abashinzwe ubuzima mu Buhinde bategetse ko uruganda rw’imiti y’inkorora ya sirop/syrups ruhagarika ibikorwa nyuma y’uko iyo miti yarwo ihujwe n’imfu z’abana muri Gambia.
Maiden Pharmaceuticals yarenze ku mategeko “mu gukora no gusuzuma ibikorwa byayo”, nk’uko abagenzuzi mu Buhinde babivuze.
Ishami rya ONU ryita ku buzima OMS ryari ryaburiye isi kubera imiti inyobwa ine y’inkorora y’uru ruganda yatumye hapfa abana hafi 70.
Iperereza n’ubu rirakomeje mu Buhinde no muri Gambia.
Abashinzwe ubugenzuzi bavuze ko bahagaritse ibikorwa byose byo gukora imiti by’uru ruganda rw’i Delhi nyuma yo kubona ko rwarenze ku mabwiriza y’ubuziranenge.
Bavuze ko “iperereza ryasanze harabayeho kurengera gukabije gushyira mu kaga ubuziranenge, no gukora imiti mizima”.
Muri ako kanya Maiden Pharmaceuticals ntabwo yasubije ubusabe bwa BBC bwo kugira icyo ivuga kuri iki cyemezo cyo kuyihagarika.
Mu cyumweru gishize, iyi kompanyi yavuze ko “yatunguwe no kumva amakuru y’izo mfu kandi ibabajwe cyane n’ibyabaye”.
Ibi byabaye nyuma y’uko OMS/WHO iburiye kuri iyo miti ine ivuga ko ishobora gukomeretsa impyiko kandi yaba ari yo yateye impfu z’abo bana mu kwezi kwa karindwi, ukwa munani n’ukwa cyenda.
OMS yaburiye kandi ko uretse Gambia iyo miti “ishobora kuba yaragurishijwe no ku yandi masoko atazwi neza mu bindi bihugu byo muri ako karere”.
Iyo miti yavuzwe ni; Promethazine Oral Solution, Kofexmalin Baby Cough Syrup, Makoff Baby Cough Syrup na Magrip N Cold Syrup.
Polisi muri Gambia irimo gukora iperereza ku mfu za bariya bana, mu gihe abatuye iki gihugu basaba ubutabera.
Perezida Adama Barrow wa Gambia yavuze ko abategetsi “nta buye bazasiga rigeretse ku rindi” mu iperereza ryabo.
Raporo y’ibanze yatanzwe na polisi ya Gambia kuwa kabiri ivuga ko iyi miti yazanywe muri Gambia na kompanyi ikorera muri Amerika.
Iyo raporo ivuga kandi ko menshi mu macupa 50,000 y’iyo miti mibi yinjijwe mu gihugu ubu yamaze gufatwa.
Source: BBC
