Abantu bagera ku 10 bishwe n’abandi 15 barakomereka mu bwicanyi bwo gutera abantu ibyuma mu ntara ya Saskatchewan muri Canada, nk’uko polisi ibivuga.
Abahohotewe basanzwe ahantu 13, naho abagabo babiri bacyekwa Damien Sanderson na Myles Sanderson ubu barimo guhigwa, polisi yavuze ko bitwaje intwaro.
Abatuye mu gace bacyekwamo basabwe kuguma mu nzu zabo mu gihe aba bagabo barimo guhigishwa uruhindu mu karere kanini.
Polisi yo mu ntara ya Saskatchewan yanditse kuri Twitter iti: “Ntuve ahantu hatekanye. Igengesere mu kwemerera abantu kwinjira iwawe”.
Bariyeri zashyizwe ku mihanda aho polisi irimo kureba imyirondoro y’abagenzi, kandi abatwaye ibinyabiziga babujijwe gutwara abantu batazi batega imodoka ku nzira.
Ubutumwa bwo kuburira bwoherejwe kuri telephone ngendanwa z’abantu mu ntara za Saskatchewan, Manitoba na Alberta akarere kangana na hafi 1/2 cy’Uburayi.
Ubu ni bumwe mu bwicanyi bukomeye Canada yigeze igira.
Kuri Twitter, Minisitiri w’intebe Justin Trudeau yavuze ko ibi “biteye ubwoba kandi bishenguye umutima”.
Mu rindi tangazo yatanze yagize ati: “Ndababaye kandi nshenguwe n’ibitero biteye ubwoba by’uyu munsi.”
Yongeyeho ko ababikoze bagomba kugezwa mu bucamanza.
Mu ijoro ryo ku cyumweru, polisi yabwiye abanyamakuru ko abakomeretse bashobora kurenga 15 bamaze kumenya, kuko hari abijyanye kwa muganga ubwabo.
Madamu Rhonda Blackmore, umukuru wa polisi muri Saskatchewan, yavuze ko hari abantu bamwe batewe ibyuma bagambiriwe, n’abandi “bisagariwe gutyo gusa”.
Damien Sanderson, w’imyaka 31 na Myles Sanderson w’imyaka 30 icyo bapfana ntabwo kiramenyakana, abategetsi nta yandi makuru barabatangaho.
Polisi ivuga ko umuntu wa mbere yahamagaye atabaza ku cyumweru 05:40 ku isaha yaho, mu murwa mukuru w’iyi ntara witwa Regina, muri 280Km uvuye i Weldon ahandi naho bateye ibyuma abantu.
Hakurikiyeho abandi benshi nabo bahamagaye batabaza.
Bariya bacyekwa babonetse bwa nyuma i Regina muma saa sita z’amanywa ku cyumweru, polisi ivuga ko bashobora kuba bari kugenda mu modoka ya Nissan Rogue.
Diane Shier utuye i Weldon avuga ko umuturanyi we yishwe, uwo ni umugabo wabanaga n’umwuzukuru we, nk’uko ikinyamakuru Globe and Mail kibivuga.
Undi muturanyi we witwa Robert Rush yavuze ko uyu mugabo yari umupfakazi uri mu kigero cy’imyaka cy’imyaka 70, ati “ntiyashoboraga no gusagarira isazi”.
Source: BBC
