Kuva mu ntangiriro z’ukwezi k’Ukuboza hagiye hagaragara imibare idasanzwe y’abandura ndetse n’abahitanwa na COVID-19, Minisiteri y’Ubuzima “MINISANTE” yemeza ko icyo cyorezo kimaze kugira ubukana buteye inkeke mu Gihugu hose.
Abaturage barasabwa kutirara kuko icyorezo kigihari ndetse bigaragara ko imibare y’abandura yikubye inshuro enye.
Kuri uyu wa Gatandatu tariki ya 16 Mutarama 2021, Minisiteri y’Ubuzima ikaba yatangaje ko habonetse abarwayi bashya 277 b’icyorezo cya COVID-19 batumye umubare w’abamaze gutahurwaho icyo cyorezo ugera ku 10,850 barimo abakirwaye 3,517 n’abamaze kubura ubuzima 140 barimo babiri bapfuye mu masaha 24 ashize.
Abapfuye ni abagabo babiri, umwe ni uw’imyaka 66 wo mu Mujyi wa Kigali, undi n’uw’imyaka 27 w’i Huye. Minisiteri y’Ubuzima yihanganishije imiryango y’ababuze ababo kubera COVID-19.
Abarwayi bashya babonetse barimo abo mu Mujyi wa Kigali: 139, Ngoma: 22, Kirehe: 19, Rulindo: 18, Huye: 15, Gicumbi: 12, Gisagara: 12, Nyamasheke: 7, Musanze: 7, Muhanga: 5, Rwamagana: 4, Nyanza: 4, Rubavu: 4, Gakenke: 3, Nyamagabe: 2, Karongi: 2, Nyagatare: 2.
Uyu munsi hakize abantu 165 bituma umubare w’abamaze gukira uba 7,193 bangana na 66.2 % by’abamaze gutahurwaho icyo cyorezo mu Rwanda, ahamaze gufatwa ibipimo 791,472 birimo 6,423 byafashwe uyu munsi.
Abaturarwanda barasabwa kwitwararika no kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa alukoro yabugenewe.
NIKUZE NKUSI Diane
