Ejo hashize tariki ya 03 Mutarama 2021, Minisiteri y’Ubuzima yatangaje ko Covid-19 yahitanye abantu batatu barimo ab’i Kigali babiri b’imyaka 75 n’undi wa 67, uwa gatatu w’imyaka 57 ni uwo mu Karere ka Huye. Aba banyakwigendera bujuje umubare w’ 101 w’abamaze kwicwa n’iki cyorezo mu Rwanda.
Uyu munsi kandi hatangajwe abarwayi bashya 109 barimo abo mu Mujyi wa Kigali 64, Musanze 20, Rubavu 12, Nyamasheke 4, Gicumbi 3, Kamonyi 3, Huye 2, n’undi umwe wo mu Karere ka Burera.
Muri rusange, abamaze gutahurwaho icyo cyorezo kuva muri Werurwe ubwo umurwayi wa mbere yabonekaga mu Rwanda ni 8,676 barimo 1,823 bakirimo kwitabwaho n’abaganga.
Hakize abantu bashya 67 bituma umubare w’abamaze gukira ugera ku 6,752 bangana na 77.8 % by’abamaze gutahurwaho icyo cyorezo mu Rwanda, babonetse mu bipimo 738,785 birimo 3,318 byafashwe uyu munsi.
Kuva mu ntangiriro z’ukwezi k’Ukuboza hagiye hagaragara imibare idasanzwe y’abandura ndetse n’abahitanwa na COVID-19, Inzego z’ubuzima zikaba zemeza ko icyo cyorezo kimaze kugira ubukana buteye inkeke mu Gihugu hose.
Muri Afurika abamaze kwandura COVID-19 bamaze kurenga miriyoni ebyiri n’ibihumbi 807.8, barimo abantu barenga miriyoni ebyiri n’ibihumbi 332 bakize, n’abandi basaga ibihumbi 66.6 bahitanywe na cyo. Abamaze kwandura ku Isi barasaga miriyoni 85.4 barimo abasaga miriyoni 60.3 bakize n’abapfuye barenga miriyoni imwe n’ibihumbi 849.
NIKUZE NKUSI Diane
