Nyuma yo kunengwa ko yapinze Covid-19 ndetse akaba yaranemezaga ko ari indwara y’abashinwa, nubwo yageze mu gihugu cye igahitana abatari bake, Perezida wa Leta Zunze Ubumwe z’Amerika Donald J. Trump we ubwe yatangaje ko we n’Umugore we Melania Trump, bamenye ko banduye icyorezo cya COVID-19 bakaba batangiye kwishyira mu kato no guhabwa ubuvuzi bukenewe.
Abinyujije ku rubuga rwa twitter akoresha cyane, muri iki gitondo cyo ku wa Gatanu ni bwo yamenyesheje abamukurikira, agira ati: “Muri iri joro, Madamu Melania Trump na nge twapimwe dusanga twanduye COVID-19 . Turatangira akato n’urugendo rwo gukira byihuse. Tuzabinyuramo twemye turi kumwe!”
Perezida Trump atangaje ko yanduye nyuma y’uko Umujyanama we Hope Hicks, agaragayeho icyo cyorezo ari na byo byabaye intandaro yo kumupima n’muryango we, kugira ngo barebe uko ubuzima bwabo buhagaze.
Hope Hicks, ubusanzwe yahoraga hafi ya Trump n’umugore we haba mu biganiro yajyagamo ndetse n’ingendo zose. Ubwo aheruka mu biganiro mpaka na mugenzi we Joe Biden nabwo bari bari kumwe.
Trump yavuze ko yatunguwe no kumva ko Huks yanduye kuko ngo buri gihe aba yambaye agapfukamunwa kandi akaba yubahiriza amabwiriza yose yo kwirinda.
Hicks ni we muyobozi wa hafi ya Trump utangajwe muri iyi minsi wanduye icyo cyorezo cyageze ku Banyamerika barenga miriyoni 7.2 kikaba kimaze guhitana abarenga 200,000 muri bo.
Abandi bayobozi bakuru bayanduye kuri ubu bamaze gukira barimo Robert O’Brien Umujyanama mu by’Umutekano ku rwego rw’Igihugu, uretse ko we bivugwa ko atajyaga amarana igihe kinini na Perezida Trump nk’uko bigenda kuri Hicks.
NIYONZIMA Theogene
