Kuri uyu wa Kane tariki ya 10 Nzeri 2020, ni bwo Perezida Kagame yiyunze ku bayobozi batandukanye ku Isi mu nama yayobowe n’Ishami ry’Umuryango w’Abibumbye ryita ku Buzima “OMS”, Perezida Kagame yatangaje ko iyo gahunda igamije kwihutisha ibikorwa byo gupima, kuvura no gukingira COVID-19 ari imwe muri gahunda z’ingirakamaro zirimo gukorwa ku Isi muri ibi bihe.
Abo bayobozi barimo Umunyamabanga Mukuru wa Loni António Guterres, Umuyobozi Mukuru w’Ishami rya Loni ryita ku Buzima (WHO/OMS) Dr. Tedros Adhanom Ghebreyesus, Umuyobozi w’Umuryango w’Ubumwe bw’Afurika (AU) Cyril Ramaphosa, Minisitiri w’Intebe wa Norvège Erna Solberg, n’abandi batandukanye.
Perezida Paul Kagame yagaragaje ko yanyuzwe no kwitabira iyo nama, ashimangira ko gahunda ya “Access to COVID-19 Tools (ACT) Accelerator” izagira uruhare rukomeye mu guhashya COVID-19, gusubiza ubukungu bw’ibihugu ku murongo n’abaturage bagasubira mu mirimo nk’uko bisanzwe.
By’umwihariko Perezida Kagame yagaragaje uburyo iyo gahunda ari ingenzi kuri Afurika, ashimira OMS, Komisiyo y’Ubumwe bw’u Burayi (EU Commission) n’indi miryango itandukanye ishyigikira inkingi z’ubuvuzi bwa COVID-19.
Yashimangiye ko nubwo ari ingenzi gushyigikira inkingi zose icyarimwe, kubona urukingo ari byo bitanga ikizere cyo gusubiza ibihugu n’abaturage mu buzima busanzwe. Yashimangiye ko hakenewe ubwisungane mu gukwiza urukingo, aho ibihugu bigomba kurubona hagendewe ku hantu rukenewe cyane kurusha ahandi.
Ati “Inkingi zo guhashya COVID-19 zose ni nziza, ariko iy’urukingo ni yo itanga ikizere guhagarika COVID-19 no kongera gusubiza ibihugu n’abaturage bacu mu mirimo bisanzwe. Dukoresheje gahunda y’ubwisungane (Pool risking), twaharanira kutabogama mu gukwirakwiza urukingo. Ibyo bizashyigikira isubukurwa ry’ibikorwa by’ubukungu bidufitiye akamaro twese. ”
Umukuru w’Igihugu yunze mu rya Dr. Tedros uvuga ko mu gihe urukingo ruzaba rubonetse rwazakoreshwa mu buryo bwitondewe, rukagezwa ku byiciro byibasiwe kurusha ibindi mu bihugu byose aho kurukwiza mu bantu bose mu bihugu bimwe na bimwe.
Perezida Kagame ati “Ibihugu biymwe na bimwe birugarijwe cyane kurusha ibindi, bamwe mu baturage muri buri gihugu bakeneye kwitabwaho kurusha abandi. Ni ingenzi kwibanda ku bibasiwe cyane.”
Perezida Kagame yasoje agaragaza uburyo COVID-19 yaje isanga u Rwanda n’Afurika bihanganye n’izindi ngorabahizi mu rwego rw’ubuzima, ashimangira ko itandukaniro hagati yo gutsinda no gutsindwa rishingiye ku kongera ibikorwa remezo by’ubuvuzi byahangana mu buryo burambye n’ikibazo cyose cy’ubuzima.
Yashimangiye ko u Rwanda rwiyemeje gukorana n’abafatanyabikorwa bose mu guharanira ko ubu bufatanye mu guhangana na COVID-19 butanga umusaruro wifuzwa.
Ubwanditsi/ @umuringanews
