Minisiteri y’Ubuzima yatangaje ko kuri uyu wa Kabiri tariki ya 19 Gicurasi 2020, habonetse abarwayi bashya 11 b’icyorezo cya Koronavirusi (COVID-19) mu bipimo 1,217 byafashwe mu masaha 24 ashize, hataha abandi 6 bakize neza, bituma umubare w’abamaze gukira ugera kuri 209.
Ibyo kandi byatumye umubare w’abakirimo kwitabwaho n’abaganga ugera kuri 99, mu barwayi 308 bose bamaze gutahurwaho icyo cyorezo mu Rwanda.
Minisiteri y’Ubuzima ivuga ko abo barwayi ba COVID-19 bamaze gutahurwa mu bipimo 52,335 byafashwe kuva umurwayi wa mbere yatahurwa mu Rwanda muri Werurwe kugeza ubu.
Abakirwaye bakomeje kuvurirwa ahabugenewe, ndetse hakomeje igikorwa cyo gupima abantu mu Gihugu, bikaba bivugwa ko kugeza ubu nta murwayi mushya uratahurwa aturutse mu Baturarwanda hagati kuko abenshi mu batahurwa baba bavuye mu mahanga cyangwa mu bashyizwe kato k’iminsi 14.
Kugeza ubu ntawurabikwa mu Rwanda ko yishwe n’icyorezo cya COVID-19. Inama y’Abaminisitiri yateranye ku wa Mbere tariki 18 Gicurasi, yanzuye ko nta gihindutse hakongera kudohorwa ku ngamba zashyiriweho kwirinda COVID-19, ingendo hagati y’Intara n’Umujyi wa Kigali, ndetse n’ibindi bikorwa by’ubuzima busanzwe byari bitaremererwa gukora bigasubukurwa.
Mu gihe guhera ku wa Mbere tariki ya 04 Gicurasi 2020 imirimo imwe n’imwe y’ubuzima busanzwe yasubukuwe, Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa alukoro yabugenewe.
Imibare yatangajwe ku rwego mpuzamahanga yerekana ko muri Afurika abamaze kwandura COVID-19 ari 88,172 barimo 33,863 bakize n’abandi 2,834 bahitanywe na cyo. Abamaze kwandura ku Isi bangana na 4,956,725 barimo abakize 1,941,288 n’abapfuye 323,095. Bivuze ko abakirimo kwitabwaho n’abaganga ku Isi bangana na 2,692,342.
NIKUZE NKUSI Diane
