Mu gihugu cy’igihangage Leta zunze ubumwe za Amerika icyorezo cya Covid-19 cyishe abantu 1,736 mu gihe cy’umunsi umwe gusa w’ejo kuwa kabiri tariki 7 Mata , nibo benshi iyi ndwara yishe mu gihugu kimwe ku munsi kugeza ubu.
Byatumye umubare w’abamaze kwicwa n’iyi ndwara muri iki gihugu uzamuka ugera ku 12,857 nk’uko bivugwa na kaminuza y’ubushakashatsi ya Johns Hopkins.
Kugeza ubu Amerika ifite abantu barenga 400,000 babonywemo Covid-19, niwo mubare munini mu gihe ubu ku isi habarwa abarenga miliyoni 1,4 banduye.
Gusa mu kiganiro n’abanyamakuru Perezida Donald Trump yavuze ko Amerika iri kugana ku gihe cyo kumanuka kw’icyi cyorezo.
New York irazahaye
Igice kinini cy’izi mpfu cyatangajwe muri leta ya New York, ifatwa nk’izingiro ry’iki cyorezo muri Amerika. Ejo gusa, muri iyi leta habaruwe abantu 731 bapfuye.
Iyi leta gusa, iri hafi guca ku Butaliyani mu mibare y’abamaze kwandura iyi ndwara.
Guverineri wayo Andrew Cuomo yavuze ko biboneka ko iki cyorezo kigeze ku gasongero. Ko abajya mu bitaro n’indembe bari kugabanuka.Anasaba abatuye uyu mujyi kwirinda kujya ahari abantu benshi.
UWIMPUHWE Egidia
