Urwego rushinzwe ubuzima “HSB” rwatangaje ko hafi icya gatatu cy’abaganga bose, ni ukuvuga 516 muri 1601 bakora mu bitaro bifashwa na leta, bamaze guhanwa cyangwa bazahanwa n’inkiko zishinzwe imyitwarire.
Aba baganga bashinjwa gusiba no kudakora ibyo bashinzwe kandi nta ruhushya cyangwa impamvu ifatika bagaragaje mu gihe kirenga iminsi itanu nk’uko bigaragara mu itangazo ryashyizwe hanze n’urwego rushinzwe ubuzima (HSB).
Ishyirahamwe ry’Abaganga bo mu bitaro bikuru muri Zimbabwe ntacyo riravuga kuri aya makuru aheruka, ariko mu minsi ishize ryinubiye iterabwoba rikorerwa abaganga nk’uko byatangajwe na Reuters.
Iyi myigaragambyo yakoze ku bitaro byinshi bikuru muri Zimbabwe ndetse kuri ubu abarwayi bitabwaho ni abarembye cyane, bakeneye ubufasha bwihutirwa gusa.
Guverinoma ya Zimbabwe ivuga ko itakwigondera kongera umushahara mu gihe Abanya-Zimbabwe bari gusaba ko iki kibazo gikemurwa vuba, bamwe muri bo bavuga ko ari Jenoside iri kwica abantu gahoro nk’uko umunyamakuru wa BBC, Shingai Nyoka, uri mu murwa mukuru Harare abivuga.
Iki gihugu cyugarijwe n’ihungabana ry’ubukungu rikabije ndetse no guta agaciro kw’ifaranga ryacyo ndetse abaturage ntibahazwa n’ayo binjiza.
Umwe mu baganga bo muri iki gihugu, Dr Lindsey Robertson, yabwiye BBC ko amafaranga bahembwa ntacyo abafasha mu buzima bwa buri munsi.
Ati” Ayo turi guhembwa ntabwo akiduhagije ku buryo yatugaburira cyangwa ngo dushobore kwishyura ubukode.”
Umushahara w’umuganga muri Zimbabwe kuri ubu ubarirwa hafi ku $100 (£80), ni ukuvuga asaga gato ibihumbi 93 Frw ku kwezi.
UWIMPUHWE Egidia
