Rutahizamu wakinanye n’ibyamamare bitandukanye birimo Romario, akaba yarahoze ari umukinnyi ukomeye Valdiram Caetano w’imyaka 36, wakinnye mu makipe 26 mu myaka 17 yamaze akina ruhago muri Brazil,yasanzwe ku muhanda yishwe n’abantu bataramenyekana, ibi bikaba byabaye nyuma y’aho yarekeye umupira w’amaguru yibasiwe n’ubukene bukabije, kuko atagiraga aho kuba akaba yanasanzwe mu muhanda yishwe.
Valdiram wamamaye cyane mu ikipe ya Vasco da Gama,yiciwe mu gace ka Santana gaherereye mu mujyi wa Sao Paulo kuwa Gatandatu w’icyumweru gishize, umurambo we wahise ujyanwa mu bitaro byo mu mujyi wa Sao Paolo kugira ngo hasuzumwe icyamuhitanye.
Valdiram ntabwo ari izina ryoroshye mu mupira w’amaguru muri Brazil kuko muri 2006 yatsinze ibitego byinshi mu irushanwa rya Copa do Brasil ubwo yakinanaga na Romario muri Vasco da Gama.
Valdiram yasinye muri Vasco da Gama mu mwaka wa 2006 atsinda ibitego 14 mu mikino 32 ndetse atsinda ibitego 7 muri Copa do Brasil y’uyu mwaka, bituma atangira gusuzugura ubuyobozi ndetse atangira gusiba imyitozo uko yishakiye.
Vasco da Gama yafatiye ibihano Valdiram birimo kumwirukana,atangira kuzenguruka amakipe anyuranye arimo n’ayo muri Qatar n’ahandi, ibi byaherekejwe n’ubukene bukomeye bwatumye yibera mu muhanda.
Valdiram wari umaze imyaka 10 yose arwana no gucika ku ngeso yo kunywa ibiyobyabwenge byari byaramwokamye,yishwe n’abagizi ba nabi bituma polisi itangira iperereza ryafashe abagabo 3 ijya kubahata ibibazo,umwe aba umwere.
IHIRWE Chriss
