Ejo kuwa 28 Werurwe 2019 mu masaha ya ninjoro abantu bataramenyekana bitwajwe imihoro n’udufuni, bateye ku ishuri rya GS Jenda, riherereye mu Karere ka Nyabihu, batema umuzamu uharinda n’abatetsi babiri.
Abatemwe bajyanywe mu ivuriro rya Jenda, naho umwe mu bakekwa yamaze gufatwa mu gihe abandi bagishakishwa, nk’uko byemejwe n’Umunyamabanga Nshingwabikorwa w’Umurenge wa Jenda, Kampire Georgette.
Yagize ati “Bateye ari abantu batandatu bitwaje imihoro n’udufuni, umuzamu arabarwanya baramutemagura bikabije, umutetsi aza atabaye nawe bamutemagura mu maso. Mugenzi we uteka nawe aje baramukubita gusa we abasha gucika ariruka”.
Kampire avuga ko abatemwe bajyanywe ku ivuriro rya Jenda, aho bari kwitabwaho n’abaganga, ubuyobozi bukaba bwabasuye bugasanga umutetsi abasha kuvuga naho umuzamu atabasha kuvuga.
Yakomeje yemeza ko hari uwitwa Kazungu ucyekwaho kuba muri ibyo bikorwa yamaze gufatwa akaba yarahoze akora kuri iki kigo.
@umuringanews,com
