Abakorera bushake b’urubyiruko rwibumbiye hamwe bageze ku ibihumbi magana abiri na miongo itanu rwahigiye kurwanya igwingira ry’abana bivuye inyuma, uyu muhigo bakaba barawuhigiye Porogaramu Mbonezamikurire y’abana bato. Buri mukorerabushake yiyemeje ko mu Mudugudu atuyemo azarwanya igwingira ry’abana yivuye inyuma, akabigeraho aganiriza ababyeyi bafite abana, akabafasha kumenya uko hategurwa indyo yuzuye no kwita ku bana babagirira isuku.
Ibi bibaye nyuma y’aho Guverinoma y’ u Rwanda ikajije umurego mu kugabanya umubare w’abana bagwingira bakava kuri 38% babarurwaga mu mwaka wa 2015, bakazaba ari 18% muri 2024. Umuhuzabikorwa w’Urubyiruko rw’abakorerabushake ku rwego rw’igihugu, Murenzi Abdallah yavuze ko basinyanye amasezerano y’umwaka umwe kandi bizeye ko bazaba bamaze kugira uruhare rugaragara mu kurandura iki kibazo. Umuhuzabikorwa wa Porogaramu y’Igihugu Mbonezamikurire y’abana bato, Dr. Anita Asiimwe, yasabye uru rubyiruko gufasha abaturage gusobanukirwa ububi n’ingaruka zo kwigwingira k’umwana. Ati“ Abakorerabushake bari hirya no hino mu gihugu, ni abantu twafatanya kugira ngo badufashe mu gukurikirana abana bose cyane cyane twibanda ku bari munsi y’imyaka ibiri.” TETA Sandra
