Kuwa Kabiri w’iki Cyumweru nibwo abacamanza b’Urukiko Mpanabyaha Mpuzamahanga (ICC) batangaje ko ubushinjacyaha butabashije gutanga ibimenyetso bihagije ku bibazo bwabajijwe, bityo rutegeka ko Laurent Gbagbo wahoze ayobora Côte d’Ivoire na Charles Blé Goudé wahoze ayoboye urubyiruko rw’ishyaka Front Populaire Ivoirien barekurwa, ariko kuri ubu uru rukiko rwa ICC rwabaye rusubitse kurekura Laurent Gbagbo nyuma y’uko ubushinjacyaha bujuririye uwo mwanzuro.
Ikinyamakuru Jeune Afrique yatangaje ko Umuvugizi wa ICC yavuze ko Gbagbo na Goudé barakomeza kuba bacunzwe n’urwo rukiko mu gihe hagitegerejwe umwanzuro ku bujurire bw’ubushinjacyaha.
Urukiko rw’ubujurire rushobora gutesha agaciro umwanzuro wo kurekura Gbagbo igihe haba habonetse ibimenyetso simusiga.
Gbagbo yari amaze imyaka irindwi muri gereza z’urwo rukiko mu Buholandi ku byaha byibasiye inyokomuntu.
We na Goudé bashinjwa uruhare mu rupfu rw’abasaga 3000 baguye mu mvururu zakurikiye amatora yo mu 2010.
Ayo matora yarangiye ibyayavuyemo bigaragaje ko Gbagbo yatsinzwe na Alassane Ouattara uyoboye igihugu kuri ubu.
Gbagbo w’imyaka 73 yanze kwemera ibyavuye muri ayo matora kugeza ubwo habaye imyigaragambyo yanamukuye ku butegetsi nabi.
Bariya bombi bashinjwaga ibyaha by’ubwicanyi, gufata ku ngufu, gukora iyicarubozo n’ibindi bikorwa bya kinyamaswa byakozwe n’ingabo zari zishyigikiye Gbagbo.
