Reuters yatangaje ko umuryango w’ibihugu byo mu Majyepfo ya Afurika (SADC) wagiriye inama Repubulika Iharanira Demokarasi ya Congo (RDC), yo kongera kubara amajwi y’ibyavuye mu matora ya Perezida kugira ngo hirindwe imvururu.
Ibyavuye mu matora yabaye kuwa 30 Ukuboza 2018 bigaragaza ko Felix Tshisekedi utavuga rumwe na Leta ari we watsinze, icyakora Martin Fayulu na we utavuga rumwe na Leta yanze ibyavuyemo.
Ibyatangajwe na Komisiyo y’amatora kandi bihabanye n’ibyabonywe n’indorerezi za Kiliziya Gatolika muri icyo gihugu.
Fayulu avuga ko Tshisekedi na Kabila bumvikanye kugira ngo bamwibe amajwi.
Reuters yavuze ko mu itangazo ryasohowe na SADC, yasabye ko habaho kongera kubara amajwi kuko bizaha ukunyurwa abatsinzwe n’abatsinze.
Uwo muryango kandi wasabye RDC gushyiraho Guverinoma ihuriweho n’impande zose zitavuga rumwe, hagamijwe gusigasira amahoro.
SADC yagize iti “Turasaba abanyapolitiki ba Congo gukurikiza uru rugero rwabyaye umusaruro mwiza muri Afurika y’Epfo, Zimbabwe na Kenya”.
Fayulu yamaze gutanga ikirego mu rukiko rurengera Itegeko Nshinga arusaba gutesha agaciro ibyo Komisiyo y’amatora yatangaje.
Aya matora ya Congo niyo yari yitezweho ihererekanyabutegetsi rya mbere rikozwe mu mahoro kuva icyo gihugu cyabona ubwigenge mu 1960.
NIYONZIMA Theogene
