Itangazo Minisiteri y’Ubuzima yo mu gihugu cya Congo Kinshasa yasohoye mu ijoro ryo kuri uyu wa Mbere rivuga ko “muri rusange abantu 96 bamaze kugaragaraho ibimenyetso bya Ebola mu gace ka Mbalako-Mangina barimo 69 byemejwe ko bayirwaye na 27 bagikekwa.” Guverinoma yahise ishyiraho gahunda yo gutanga ubuvuzi bw’ubuntu mu duce dutatu twibasiwe n’iyo ndwara, turimo Mabalako, Oicha na Beni.
Nyuma y’imibare yaherukaga gutangazwa, abakora mu nzego z’ubuzima batangaje ko hari abandi bantu batanu bahitanwe n’iyo ndwara mu gace ka Mbalako-Mangina, hafi y’umujyi wa Beni watangiriyemo icyo cyorezo.
Umuhuzabikorwa wa gahunda yo kurwanya Ebola muri utwo duce, Dr Bathé Ndjoloko Tambwe yavuze ko ubuvuzi bw’ubuntu bugamije gutinyura abaturage kugira ngo hatagira utinya kujya kwivuza kubera ubushobozi.
Urujya n’uruza rw’abantu muri Kivu y’Amajyaruguru ni imwe mu mbogamizi abashinzwe ubutabazi bagaragaza, ituma guhashya Ebola muri ako gace bitagerwaho uko byifuzwa. Abantu 1273 nibo bamaze guhabwa urukingo rwa Ebola nk’uko Jeune Afrique yabitangaje. Abarwayi bari kuvurwa hifashishijwe umuti uzwi nka Mab114.
Mu ntangiriro z’uku kwezi nibwo ubuyobozi bwatangaje ko yongeye kugaragara, ikaba ari inshuro ya cumi Ebola yibasira Congo kuva mu 1976.
Twabibutsa ko Ebola ari indwara yandura iyo amaraso cyangwa amatembabuzi y’umuntu uyirwaye akoze ku muntu muzima, ibimenyetso byayo hakaba harimo kugira umuriro, kurwara umutwe, kuribwa mu ngingo, kubabara mu muhogo, gucika intege, guhitwa, kuruka cyane kandi kenshi, kuribwa mu nda no kuva amaraso ahantu hose hari umwenge ku mubiri.
NIKUZE NKUSI DIANE
