Igisirikare cya Israel (IDF) kivuga ko cyateye ibice bigera kuri 400 muri Gaza mu masaha 24 ashize, bivuye kuri 320 catangaje ejo mu kiringo nk’ico nyene.
Mu butumwa yacishije kuri X (yahoze yitwa Twitter), IDF ivuga ko mu bice yateye harimo abarwanyi ba Hamas barimo bitegura gutera ibisasu bya muzinga muri Israel, hamwe n’inzira yo mu kuzimu yifashishwa na Hamas mu kwinjira muri Israel iciye mu kiyaga.
Ivuga kandi ko ibigo bikoreshwa n’ingabo zihagarariye intambara hamwe n’ibice bibikwamo intwaro mu misigiti yasenwe.
IDF yongeraho ko “izakomeza ibitero mu ntumbero yo gucunga umutekano n’abasivile b’intungane”.
Minisiteri y’Ubuzima yo mu butegetsi bwa Hamas muri Gaza itangaza ko abantu 5000 ari bo bamaze kwicwa kuva ku wa 07 Ukwakira.
Abategetsi bo hejuru mu biro by’umukuru w’igihugu no muri Minisiteri y’Ububanyi n’amahanga muri Amerika bavuze ko ubu atari igihe nyacyo cyo guhagarika intambara hagati ya Israel na Hamas, niko bivugwa.
Ejo ku wa mbere, umuvugizi w’Inama nkuru y’igihugu ishinzwe umutekano, John Kirby , yabwiye abanyamakuru ati: “Ntabwo twizeye ko iki ari cyo gihe nyacyo cyo guhagarika intambara.
Israel ifite uburenganzira bwo kwirwanaho. Iracyafise igikorwa kinini cyo guhiga abategetsi ba Hamas”.
Mu kindi kiganiro n’abanyamakuru, umuvugizi wa Minisiteri y’Ububanyi n’amahanga,Mathew Miller yongeyeho ati: “Kuri iki kibazo, icyo tuzakomeza gukora n’ukwita ku kugeza imfashanyo muri Gaza”.
Ibigo bishinzwe imfashanyo birasaba ko intambara muri Gaza ihagarara kuko abaganga baburira ko kuba Isiraheli yarafunze peteroli bivuze ko abandi bana benshi batishoboye ndetse n’abakomeretse bari mu bitaro bazapfa vuba. Ikigo kimwe kivuga ko byibuze abana 2000 muri Gaza bapfuye mu byumweru bike bishize.
Ubuyobozi bwa Isiraheli bwiyemeje guhanagura ku isi Hamas mu rwego rwo kwihimura ku bitero by’iterabwoba byo kuya 7 Ukwakira, yishemo abantu 1400 biganjemo abasivili, abandi barenga 200 bajyanwa bunyago.
Ku wa mbere, Hamas yarekuye abaturage babiri ba Isiraheli – bombi bageze mu za bukuru – mu gihe igitutu cy’amahanga gikomeje kwiyongera kugira ngo abasigaye bashimuswe bavanwe i Gaza.
INKURU YANDITSWE NA TYISHIME Eric
