Intambara hagati ya Israel na Hamas ikomeje kwamaganwa n’ibihugu ndetse n’imiryango itandukanye, ariko igitero cyamishije ibisasu kuri uyu wa kabiri tariki 18 Ukwakira 2023 ku bitaro bya Al Ahli mu mujyi wa Gaza, bigahitana abasaga 500 ndetse bigasiga n’inkomere zitari nke cyamaganwe ku bwinshi.
Hamas yashinje Israel kugaba ibyo bitero, ariko muvugizi w’igisirikare cya Israel Daniel Hagari, yavuze ko ingabo zabo nta bikorwa bya gisirikare zari zirimo mu masaha igisasu cyarasiwe ku bitaro ndetse ko n’ubwoko bw’icyo gisasu batabugira.
Ibi bitangazwa na Israel bikaba byamaganiwe kure na Hamas yatangaje ko ibyo Israel ivuga ari ibinyoma kuko nta kindi basobanura, nyuma y’ibyo bise ‘ubwicanyi’ bwagambiriwe.
Perezida wa Leta Zunze Ubumwe za Amerika, Joe Biden yatangaje ko yababajwe cyane n’icyo gitero cyagabwe ku bitaro, avuga ko bihabanye cyane n’amategeko mpuzamahanga y’intambara.
Biden yavuze ko yategetse inzego z’ubutasi n’iz’umutekano gushakisha amakuru, bakamenya neza uwarashe kuri ibyo bitaro.
Perezida wa Leta Zunze Ubumwe za Amerika, Joe Biden yahagurutse mu gihugu cye yerekeza muri Israel mu rwego rwo kwerekana ko ashyigikiye icyo gihugu kiri mu ntambara n’umutwe wa Hamas guhera mu byumweru bibiri bishize.
Ni uruzinduko Biden agiriye muri Israel bitunguranye, nyuma y’amasaha make ibitaro birashwe muri Gaza hagapfa abagera kuri 500.
Yabanje guhura na Minisitiri w’Intebe wa Israel, Benjamin Netanyahu nk’uko John Kirby umuvugizi w’inama y’igihugu y’umutekano yabitangaje.
Nyuma na Netanyahu, Biden aragirana inama n’abandi bayobozi ba Israel bari muri gahunda yo gufasha igihugu mu ntambara.
Kirby yavuze ko muri urwo ruzinduko byitezwe ko Biden aza kubaza abayobozi ba Israel ibibazo bikomeye.
Umunyamabanga Mukuru wa Loni, Antonio Guterres yamaganye bikomeye icyo gitero, asaba ko imirwano ihagarara ubuzima bw’abasivile bukabanza kwitabwaho.
Umuyobozi wa Komisiyo y’Umuryango wa Afurika Yunze Ubumwe, Moussa Faki Mahamat we yashinje Israel ibyaha by’intambara nyuma y’icyo gitero cyagabwe ku bitaro.
Perezida w’u Bufaransa, Emmanuel Macron yavuze ko nta kintu na kimwe cyaba urwitwazo rwo kurasa ku bitaro birimo abarwayi, abasivile n’abandi.
Misiri, Jordanie, Arabie Saoudite, Leta Zunze Ubumwe z’Abarabu byamaganye icyo gitero byivuye inyuma ndetse Jordanie ihita ihagarike kwakira Perezida Joe Biden uri mu ruzinduko mu Burasirazuba bwo hagati.
U Burusiya na Leta Zunze Ubumwe z’Abarabu basabye ko akanama ka Loni gashinzwe umutekano gaterana igitaraganya kuri uyu wa Gatatu, bakavuga kuri icyo gitero.
INKURU YANDITSWE NA TUYISHIME Eric
