Abashinwa babiri bishwe mu gihe umubare w’abantu bataramenyekana na wo washimuswe n’abarwanyi b’umutwe wa CODECO mu Burasirazuba bwa Repubulika Iharanira Demokarasi ya Congo ahantu hakorerwa ubucukuzi bw’amabuye y’agaciro.
Abayobozi bo muri ako gace batangaje ko hari abantu babiri bishwe ndetse ko ari abaturage b’u Bushinwa. Baguye mu gitero cyagabwe ku wa Gatatu mu gihe abandi baburiwe irengero.
Bashinja CODECO, umwe mu mitwe yitwaje intwaro ibarizwa muri ako gace ko ariwo wakigabye.
Iki gitero cyabereye mu gace ka Djugu muri Ituri aho abo Bashinwa bakorera ubucukuzi bw’amabuye y’agaciro.
Umuvugizi w’Ingabo za RDC muri Ituri, Lieutenant Jules Ngongo, yagize ati “Turahamya ko hari abarwanyi ba CODECO bagabye igitero ku birindiro byacu bimwe muri Djugu. Banateye aho abavandimwe bacu b’Abashinwa bakoreraga, babiri muri bo baricwa abandi barashimutwa.”
Loni itangaza ko muri ako gace, abarwanyi ba CODECO bakunze kuhagaba ibitero bihitana abasivile. Byatangiye mu 2017 bituma amagana yabo ahunga.
Mu ijoro ryo ku Cyumweru bivugwa ko hari abasivile 20 biciwe mu gitero cya CODECO.
ubwanditsi@umuringanews.com
