Kuri uyu wa mbere tariki 25 Ukwakira 2021, Minisitiri w’Intebe wa Sudani, Abdallah Hamdok, yatawe muri yombi n’Ingabo z’iki gihugu zimufungira iwe mu rugo.
Amakuru avuga ko uretse Hamdok uri mu maboko y’igisirikare hari n’abandi bayobozi bakuru b’iki gihugu na bo batawe muri yombi.
Bivugwa ko abandi bayobozi batawe muri yombi barimo Minisitiri w’Inganda, Ibrahim al-Sheikh, uw’Itumanaho, Hamza Baloul ndetse n’Umujyanama wa Minisitiri w’Intebe mu bijyanye n’itangazamakuru, Faisal Mohammed Saleh.
Umuvugizi w’Akanama kayoboye Sudani muri iki gihe, Mohammed al-Fiky Suliman ndetse na Guverineri w’Umujyi wa Khartoum, Ayman Khalid nabo bari bamaze igihe gito batawe muri yombi.
Bamwe mu bo mu miryango y’abatawe muri yombi bemereye AlJazeera dukesha iyi nkuru koko ko igisirikare cyabafunze.
Kuva mu kwezi gushize ubwo haburizwagamo ihirikwa ry’ubutegetsi, Sudani iri mu bihe by’imvururu hagati y’abasirikare n’abasivile bapfa isaranganya ry’ubutegetsi nyuma y’ihirikwa rya Omar al-Bashir wayoboraga iki gihugu.
Twabibutsa uwahoze ari perezida wa Sudani ‘Bashir’ yahiritswe ku butegetsi mu mwaka wa 2019, nyuma y’imyigaragambyo imwamagana yari imaze gufata indi ntera muri iki gihugu.
NIYONZIMA Theogene
