Zimbabwe yatangiye gukingira Covid-19 abana b’imyaka 14 ndetse ubu abantu bakingiwe byuzuye nibo bemerewe kujya kurira muri restaurants. Ni umwanzuro wafashwe ugamije gushishikariza abantu kwikingiza iki cyorezo vuba bishoboka.
Minisitiri ushinzwe itangazamakuru mu gihugu, Monica Mutsvangwa, yatangaje ko nyuma y’inama z’abaganga, igihugu cye kigiye gukingira n’abana bari hagati y’imyaka 14 na 17. Abari basanzwe bakingirwa ni abari hejuru y’imyaka 18.
Restaurants izajya igibwamo n’umuntu wagaragaje ko yikingije inkingo zombi ndetse mu minsi ishize abantu bikingije byuzuye nibo bemerewe kujya gusengera mu materaniro.
Hafi miliyoni 2,5 z’abanya-Zimbabwe bangana na 16% bamaze kubona nibura urukingo rumwe. Abamaze gukingirwa byuzuye ubu barenga miliyoni 1,5 bituma iki gihugu kiza mu bya mbere bimaze gukingira umubare munini kuri uyu mugabane.
Muri Afurika yose, abamaze kubona urukingo rumwe bangana na 5% bya miliyari 1,3 z’abatuye uyu mugabane.
Zimbabwe iherutse kubona inkingo zingana na dose miliyoni 13 ziganjemo izakorewe mu Bushinwa za Sinopharm na Sinovac
Abamaze kwandura muri iki gihugu ubu ni 123.986 mu gihe abahitanywe n’iki cyorezo bo ari 4.356.
NIYONZIMA Theogene
