BBC yatangaje ko Arabie Saoudite yahakanye ivuga ko umuryango w’Ibwami uri ku butegetsi nta ruhare wagize mu iyicwa ry’uyu munyamakuru Jamal Khashoggi, ibwegeka ku ntasi zayo zataye umurongo. Byemezwa ko ku ikubitiro, Arabie Saoudite yahakanye yivuye inyuma ko itazi ibyabaye kuri uyu munyamakuru, ariko umushinjacyaha w’iki gihugu ubu noneho avuga ko iyicwa rye ryari ryagambiriwe.
Ubwo yafataga ijambo ku wa gatandatu mu nama mu gihugu cya Bahrain, Adel al-Jubeir yashinje ibitangazamakuru by’i Burayi no muri Amerika gutwarwa n’amarangamutima mu buryo bitangaza inkuru zijyanye n’iyicwa ry’uyu munyamakuru. Ibi akaba yarabitangaje nyuma y’umunsi umwe Turukiya itangaje ko yifuza kohererezwa abaturage 18 ba Arabie Saoudite abategetsi bacyekaho kugira uruhare muri ubwo bwicanyi.
Jubeir yabwiye inama yiga ku mutekano yo muri Bahrain ati: “Ku kibazo cyo kohereza abacyekwaho kwica Bwana Khashoggi, ni abaturage ba Arabie Saoudite. Bafungiye muri Arabie Saoudite, iperereza riri gukorerwa muri Arabie Saoudite, kandi bazaburanishirizwa muri Arabie Saoudite.”
Yashimangiye ko Turukiya na Arabie Saoudite bitazwiho kugirana amasezerano yo kohererezanya abacyekwaho ibyaha, akaba ari muri urwo rwego abakekwaho ubwicanyi bafungiye muri Arabie Saoudite kuko ari abaturage baho.
Twabibutsa ko uyu nyakwigendera Khashoggi yari kavukire wa Arabie Saoudite, akaba yari umunyamakuru wanengaga ubwami bw’iki gihugu, bikaba byemezwa ko yiciwe mu nyubako y’ibiro by’uhagarariye Arabie Saoudite mu murwa mukuru wa Turukiya, Istanbul.
NIYONZIMA Theogene
