Imyiteguro yo kwitabira BAL 2025 ku ikipe ya APR BBC, ikomeje gukomwa mu nkokora nyuma y’aho abakinnyi bayo bakomeye bagiriye imvune ikomeye mu mukino uheruka.
Abo bakinnye bateje ikibazo mu myiteguro y’iyi kipe ni Shema Osborn na Nobel Boungou Colo bagiriye imvune zikomeye mu mukino wa nyuma w’irushanwa ryo Kwibuka ku nshuro ya 31 Jenoside yakorewe Abatutsi mu 1994.
Shema ni umwe mu bakinnyi ngenderwaho mu ikipe yiIgihugu ndetse na Nobel kuko ni umwe mu bakinnyi bashya Ikipe ya APR yaguze mu rwego rwo guha imbaraga iyi kipe bitegura amarushanwa ya BAL.
The New Times yatangaje ko Shema Osborn yagize imvune mu ivi, bityo azamara hanze y’ikibuga hagati y’amezi 6 n’ 9, mu gihe Nobel we yagize ikibazo ku mutsi uri hejuru y’agatsinsino, akaba azamara hagati y’amezi 8 n’umwaka adakina.
Mu irushanwa rya BAL 2025, APR BBC iri kumwe na Al-Ahli Tripoli yo muri Libya, MBB yo muri Afurika y’Epfo hamwe na Nairobi City Thunder yo muri Kenya.
BAL 2024 akaba ari naryo rushanwa riheruka ryegukanywe na Petro de Luanda yo muri Angola, iba ikipe ya mbere yo munsi y’ubutayu bwa Sahara iryegukanye kuva ryatangira gukinwa mu 2020.
INKURU YA TUYISHIME Eric
