Inzira itangaje y’urubyiruko rwafashe iya mbere rugashinga ishyirahamwe “Youth Voice in Leadership Equality and Development” (YVLED) yerekana ko urubyiruko rushobora gutsinda ibibazo bikomeye bikomoka ku ihohoterwa haba irikorerwa ku gitsina, ku mubiri, irikomeretsa umutima ndetse n’iryo kwimwa uburenganzira ku mitungo.
Babigeraho bayobora ibikorwa by’impinduka mu rubyiruko binyuze mu kumenya uburenganzira bwabo, kwitunyuka, kwigirira icyizere no kwiyubaka barwanya ihohoterwa, bahindura imyumvire ya sosiyete kandi bateza imbere ahazaza habereye bose.
Uyu akaba ari umusaruro ushimishije ukomoka ku rubyiruko rugera kuri 31 (abakobwa 26 n’abahungu 5), abenshi muri bo ni abakomoka mu karere ka Nyaruguru, bashinze ririya shyirahamwe “Youth Voice in Leadership Equality and Development” biha intero igira iti: “Tuyobore Ubu Ejo Hacu ni Heza”, rikorera mu turere twa Nyaruguru na Bugesera.
Icyerekezo cyo guteza imbere urubyiruko
Intego nyamukuru y’iri shyirahamwe ni kuzamura ijwi ry’urubyiruko mu buyobozi, uburinganire n’iterambere; Gufasha urubyiruko by’umwihariko umukobwa kumva ko bishoboka kwibona mu nzego z’ubuyobozi zifatirwamo ibyemezo no Gufasha abana batishoboye kugera ku burenganzira bwabo bwo kwiga babiishyurira ifunguro ryo ku ishuri (scholl feeding).
Urugero rwiza rw’ibyagezweho
Inkomoko y’iri shyirahamwe ni urubyiruko rwahurijwe hamwe harimo abana basambanyijwe bakabyara inda zitateganyijwe, abagizweho ingaruka n’ihohoterwa rishingiye ku gitsina ryo mu miryango, abafite ubumuga ndetse n’abishoye mu biyobyabwenge bakava mu ishuri, bafashijwe guhindura imyumvire idahwitse bari bafite ikomoka ku ihohoterwa, biyubakamo icyizere cyabaviriyemo kwiyubaka no kwiteza imbere, bakaba barabaye umusaruro wo kuva ku rwego rw’abagenerwabikorwa ba PLAN International Rwanda, kuri ubu ni abafatanyabikorwa bayo .
Yansoneye Solange, ni umukobwa ukomoka mu karere ka Nyaruguru, mu murenge wa Rusengo, akaba ari umuyobozi ku rwego rw’igihugu wa “Youth Voice in Leadership Equality And Development” atangaza ko Plan International Rwanda yabashyize muri Club zibafasha gutangira kumva ko bishoboka, ari nabwo batangiye gutinyuka kuvugira mu ruhame, batangira gukora ubuvugizi bw’umwana w’umukobwa berekana ko ashoboye, afite imbaraga yaba mu mubiri no mu bitekeerezo.
Ati: “Nanjye ndi umwe mu rubyiruko rwari rwaragizweho ingaruka z’ihohoterwa ryo mu muryango, numva nariburiye icyizere, numva ihohoterwa rikorerwa mu muryango nanjye ariryo rintegereje ariko nyuma yo guhugurwa na PLAN International Rwanda, nkigarurira icyizere, nkatangira kwitinyuka, nkatangira gupangira ejo hanjye hari aho byangejeje ndetse ntangira no gufasha abandi.”
Akomeza agira ati: “Aya mahirwe twagize rero twasanze ari ngombwa ko urubyiruko rwinshi twasize hirya iyo mu giturage ubona nyina akorerwa ihohoterwa akumva ko aribwo buzima nawe agomba kuzabamo, umwana w’umukobwa usambanywa akumva ariko ubuzima bwabigenje ntamenye guharanira uburenganzira bwe ahubwo agahindura imyumvire aharanira uburenganzira bwe, aharanira kwiyubaka no kwiteza imbere. Niyo mpamvu duharanira iterambere rizira kwitinya no kumenya ibyiza by’uburinganire”.
Uwimfura Ester, ukomoka mu karere ka Gatsibo, wasambanyijwe akabyara afite imyaka 17, atangaza ko kuva muri 2018 yafashijwe na PLAN International Rwanda, akigishwa ndetse akanagira ubumenyi buhagije bujyanye no kurwanya ihohoterwa rishingiye ku gitsina ndetse akanaharanira kwigira no kwiteza imbere imbere, kuri ubu akaba afite aho ageze ndetse ndetse ari umwe mu bashinze ishyirahamwe “Youth Voice in Leadership Equality And Development”.
Ati: “Maze kubyara nari nkiri umwana nanjye, urumva ko ak’ababyeyi ko kundakarira no gutungurwa n’ibimbayeho katabuze, ariko nafashijwe kumenya uwo ndiwe, kugira imyumvire ituma ntekereza ndetse nkanapangira ejo hazaza hanjye, ubu mfite company yanjye, narashatse mfite urugo rwiza nkaba ndi umubyeyi w’abana 2, ibi byose nkaba mbikesha gusobanukirwa n’uburenganzira bwanjye nk’umwana w’umukobwa no guharanira kwiteza imbere”.
Bafashijwe guhindura ubuzima, nabo babyitura bagenzi babo
Babona Mahoro Celine, umujyanama k’uburinganire muri Plan International Rwanda atangaza ko kuva mu mwaka wa 2016 ruriya rubyiruko rwashinze “Youth Voice in Leadership Equality And Development” batangiranye nabo biciye muri gahunda ya “Girls Takeover” yari igamije gutinyura abakobwa no kubamenyereza ubuyobozi, kugeza muri Nyakanga 2024 bari abagenenerwabikorwa ba PLAN International Rwanda, iyi gahunda ikaba yari igizwe n’urubyiruko ruri mu kigero cy’imyaka 16 na 17.
Ati: “Nyuma yo kugira ubumenyi buhagije nibwo batangiye kwifashishwa mu bukangurambaga bw’uburinganire n’ubwuzuzanye, bamaze kumva hari aho bageze nibwo byavuyemo igitekerezo kibaturutseho cyo gushinga ishyirahamwe, “Youth Voice in Leadership Equality And Development” rigamije gufasha urubyiruko rufite ibibazo nk’ibyo bari bafite.”
Babona Mahoro akomeza atangaza ko uru rubyiruko ari umusaruro mwiza wishatsemo ibisubizo byo gufasha bagenzi babo.
Ati: “Ubu ni abafatanyabikorwa ba PLAN International Rwanda, mu gukora ubukangurambaga mu rubyiruko, guteza imbere uburinganire, uburenganzira bw’abana, abakobwa n’urubyiruko ndetse bagafasha n’abakobwa kugira ubumenyi buhagije ku burenganzira bwabo”.
YVLED YIYEMEJE kurema impinduka mu muryango nyarwanda
Mu karere ka Nyaruguru bafasha abana 65 mu gihe mu karere ka Bugesera bafasha abana 100 biga mu mashuri yisumbuye, muri bo harimo abafite ubumuga, abirera, abasambanyijwe bakabyara bakiri abana, abaturuka mu miryango irimo amakimbirane hamwe n’abana b’abasigajwe inyuma n’amateka by’umwihariko bafasha abana biga mu mashuri yisumbuye.
Abandi bagenerwa bikorwa ba “Youth Voice in Leadership Equality Anda Development ni ababyeyi bishyuririye mitiweli de sante bagera kuri 300 bo mu karere ka Nyaruguru na Bugesera ndetse bakaba banateganya ko mu mwaka utaha wa 2025 gutangira gushyira abagenerwabikorwa babo mu matsinda bazakoreramo ibikorwa bibinjiriza.
MU MAFOTO: URUBYIRUKO RUGIZE YVLED MU BIKORWA BINYURANYE
INKURU YA NIKUZE NKUSI Diane
