Umutoza w’ikipe ya APR FC Darko Novic avuga ko kimwe mu byatumye batsindwa n’ikipe ya Simba ku munsi wayo uzwi nka SIMBA DAY, harimo kudashyira igitutu kuwo bahanganye n’ibindi.
Ibi byatangajwe mu kiganiro yahaye televiziyo ya Azam nyuma y’aho ikipe ya Simba SC itsinze APR FC ibitego 2-0 mu mukino w’ibirori by’umunsi wa byabaye tariki 3 Kanama 2024.
Yagize ati: “Uyu munsi nshobora kunyurwa n’ibintu byinshi, by’umwihariko Simba SC yatsinze ibitego bitavuye ku guhererekanya, byose byari amashoti ya kure. Icyo nabuze ku bakinnyi banjye ni uguhererekanya umupira cyane, gutuza bafite umupira no gushyira igitutu ku wo duhanganye ariko birumvikana abafana bari hano n’ikipe nziza yari imbere yacu.”
Darko Novic yakomeje avuga ko uyu mukino ubasigiye ubunanaribonye buzabafasha mu gihe kiri imbere kuko bafite abakinnyi bakiri bato.
Ati: “Hari abakinnyi benshi bato mu ikipe yanjye, ni ubunanaribonye bwiza kuri twebwe uyu munsi buzadufasha mu gihe kiri imbere.”
APR FC iri kwitegura imikino y’ijonjora ry’ibanze rya CAF Champions League izakina na Azam FC yo muri Tanzania hagati ya tariki 18 na 25 Kanama 2024, mu gihe tariki ya 10 Kanama 2024, iyi kipe izakina umukino w’Igikombe kiruta ibindi mu Rwanda “Super Cup 2024” na Police FC uzaba ufungura umwaka w’imikino 2024-2025.
INKURU YA IHIRWE Chris
