Umuvugizi w’Igisirikare cyafashe ubutegetsi bwa Gabon bayobowe na Gen. Brice Oligui Nguema yatangarije kuri Televiziyo y’Igihugu ko bemeje gufungura imipaka yo ku butaka, mu mazi ndetse n’iyo mu kirere, yemeza ko bigomba guhita bikorwa ako kanya.
Ku wa 30 Kanama 2023 ubwo abasirikare 12 barindaga Ali Bongo bari bamaze kumuhirika, babinyujije turi Televiziyo ya Gabon 24 bahise batangaza ko imipaka y’igihugu yose yafunzwe kugeza igihe ibintu bizasubirira mu buryo.
Ali Bongo w’imyaka 64 yahiritswe ku butegetsi nyuma y’amasaha make Komisiyo y’Amatora muri Gabon itangaje ko yegukanye amatora y’Umukuru w’Igihugu ku majwi 64.27%, ibyagombaga kumuhesha amahirwe yo kongera kuyobora Gabon muri manda ya gatatu.
Ni amatora Ali Bongo byatangajwe ko yari yatsinzemo Albert Ondo Ossa bari bahatanye, aho we yari yagize amajwi 30.77%.
Icyo gihe abo basirikare bahiritse ubutegetsi batangaje ko batesheje agaciro ibyavuye muri ayo matora, ibyashyize iherezo ku myaka 55 umuryango w’Aba-Bongo wari umaze uyobora iki gihugu gituwe n’abaturage basaga miliyoni ebyiri.
Nubwo imipaka yafunguye iri tsinda rya gisirikare ryatangaje ko ibyo gutegura amatora byo bitazihutishwa vuba mu rwego rwo kwirinda ko amakosa yakozwe n’ubutegetsi bwabanje yakongera kwisubiramo.
Biteganyijwe ko ku wa 04 Nzeri 2023, General Brice Oligui Nguema azarahirira kuyobora igihugu muri manda y’inzibacyuho mu gihe amatora ataraba, nk’uko AFP yabitangaje.
Ni mu gihe abatavuga rumwe n’ubutegetsi bayobowe na Ondo Ossa bavuga ko amajwi yo mu matora aheruka yasubirwamo kuko byagaragaza ko ari we wayatsinze.
SOURCE: AFP
